La regenza grischuna conferma sia decisiun, da betg conceder a la scola professiunala da tgira dal Grischun a Glion, SPTG, ina incarica da prestaziun per instituir e per manar ina scola professiunala superiura da tgira. Per ch'il Grischun possia cumpeter en il martgà da furmaziun naziunal, duai vegnir instituida mo a Cuira ina purschida da furmaziun che correspunda als basegns dal Grischun. L'instituziun supplementara da la scolaziun a Glion fiss colliada cun custs annuals supplementars da circa in milliun francs. Quai declera la regenza en sia resposta a la dumonda parlamentara dal cussegl grond. Ultra da quai ha la regenza prendì enconuschientscha d'ina petiziun sco er d'ina resoluziun concernent la scola professiunala da tgira dal Grischun a Glion.

Da nov vegn la scolaziun da tgira instituida tenor las prescripziuns da la confederaziun a las scolas professiunalas superiuras ed a las scolas spezialisadas superiuras. Per ch'il chantun Grischun possia cumpeter cun forzas unidas en il martgà da furmaziun naziunal, era la regenza - sa basond sin ina appreziaziun generala - s'exprimida gia pli baud d'instituir ina scola professiunala superiura da tgira (SPS-tgira) a Cuira.
Sco quai che la regenza menziunescha en sia resposta a la dumonda Bundi ch'è vegnida inoltrada la sessiun dal cussegl grond dal december 2006, aveva ella, en connex cun questa decisiun, resguardà tranter auter ils resultats da la discussiun cun la scola professiunala da tgira dal Grischun a Glion. Ultra da quai era resultà che l'instituziun d'ina SPS-tgira supplementara na correspundia - sa basond sin il dumber da las studentas e dals students sco er sin las plazzas da praticum che stattan a disposiziun - betg ad in basegn. Tenor la basa da calculaziun actuala chaschunass ina tala scola annualmain custs supplementars da circa in milliun francs.
L'examinaziun e l'evaluaziun dals arguments ch'èn vegnids preschentads en il conclus correspundent na mussan tenor la regenza betg novas enconuschientschas. Per motivs da la politica da furmaziun e da la politica d'economia conferma ella perquai sia decisiun, da betg conceder a la SPTG ina incarica da prestaziun per instituir e per manar ina scola professiunala superiura da tgira. L'incarica da prestaziun a la scola professiunala da tgira dal Grischun a Glion terminescha l'onn 2011. Er l'introducziun da pauschalas federalas ch'è planisada en il sectur da la furmaziun professiunala na mida nagut vi da quest fatg. Las pauschalas federalas cuvran numnadamain mo ina pitschna part dals custs totals da la furmaziun professiunala en ils chantuns.

Prendì enconuschientscha da la resoluziun e da la petiziun
Il medem mument ha la regenza prendì enconuschientscha da la resoluziun da la regiun Surselva concernent la scola professiunala da tgira dal Grischun a Glion sco er da la petiziun ch'è vegnida iniziada dal comité independent da las partidas, Forza Surselva, e ch'è vegnida suttascritta da passa 11'300 persunas che vulan er s'engaschar per mantegnair la SPTG.
Sco quai che la regenza declera en sia resposta a la regiun Surselva, mussa la resoluziun inoltrada cleramain che las delegadas e ch'ils delegads da la regiun Surselva s'expriman cleramain per rinforzar Glion sco lieu da furmaziun en la Surselva. Quellas persunas admettan che la regiun Surselva veglia bain s'engaschar en moda substanziala, magari er sco instituziun responsabla per la furmaziun a Glion. La regenza beneventa in engaschament rinforzà da la corporaziun regiunala, tant pli che quai vegn gia pratitgà per part er en autras regiuns. La pro Engiadina bassa, PEB, paja per exempel gia dapi onns contribuziuns considerablas a l'institut autalpin Ftan.
Areguard la pretensiun ch'è cuntegnida en la resoluziun, numnadamain da trair "decisiuns spertas" en connex cun il model da splitting per la scola professiunala a Glion, menziunescha la regenza ch'ella prefereschia en questa dumonda ina procedura da decisiun en moda ordinaria. Gist l'experiment da la scola cun il model da splitting sco er la renconuschientscha d'ina scola media professiunala a la scola mercantila Surselva mussan cleramain che la regenza è s'engaschada e s'engascha ils ultims onns adina puspè per rinforzar il lieu da furmaziun Surselva. En quest connex ston dentant vegnir resguardads er ils interess d'autras regiuns dal chantun, sch'i sa tracta da scumparter purschidas da furmaziun subvenziunadas dal chantun.

In'amplificaziun fiss giavischabla, dentant betg realisabla
En sia resposta a la petiziun dal comité Forza Surselva exprima la regenza ch'ella chapescha che sia decisiun possia chaschunar dischillusiuns, er sche quella è fundada sin motivs objectivs. La critica pauschala da la petiziun cunter il cussegl grond e cunter la regenza na resguarda dentant betg che la regenza ha contribuì ils ultims onns cun differentas mesiras a rinforzar Glion en il sectur da furmaziun sco center regiunal da furmaziun sin il stgalim secundar II.
Ch'i vegn pretendì en la petiziun per tut il chantun ina "amplificaziun da l'infrastructura cumpletta en tut ils secturs da la vita" è per la regenza bain desiderabel, ma strusch realisabel. Surtut na po la regenza betg impedir en il sectur da furmaziun il regress frappant da las naschientschas. La regenza s'engascha per mantegnair e per metter a disposiziun en il sectur da furmaziun ina purschida uschè vasta sco pussaivla per il chantun Grischun. I na vegn però betg ad esser pussaivel da porscher tut dapertut. En il rom da la furmaziun cun accent - ch'è indispensabla - è la regenza però adina pronta da resguardar ils interess da las singulas regiuns e da realisar, sche pussaivel, soluziuns correspundentas.

Gremi: regenza
Funtauna: rg chanzlia chantunala dal Grischun