La fin da favrer 2007 va Georg Ragaz, manader da la partiziun natira e cuntrada da l'uffizi per la natira e l'ambient, en pensiun. Cun el ans banduna ina persunalitad che ha gronds merits areguard la protecziun da la natira e da la cuntrada en il Grischun.

Georg Ragaz è entrà en il servetsch dal chantun il cumenzament da mars 1972 ed ha lavurà blers onns sco "tgirader chantunal da la cuntrada", da quel temp en il departament da giustia e polizia.
Durant ils emprims onns era sia lavur principala la collavuraziun e la realisaziun dal conclus federal davart las mesiras urgentas en la planisaziun dal territori e la zavrada correspundenta da territoris da protecziun en il sectur da la cuntrada e da la natira. Ulteriurs accents da sia lavur èn stads d'accumpagnar las numerusas planisaziuns d'utilisaziun en las vischnancas sco er da tgirar intensivamain projects gronds p.ex. la construcziun da la via naziunala A13 sco er l'avertura nova da differentas destinaziuns turisticas.
Ina cesura decisiva en l'activitad da Georg Ragaz ha effectuà l'acceptaziun da l'uschenumnada "iniziativa da Rothenthurm" l'onn 1987. Da quel temp aveva l'uffizi per la cuntrada e per la protecziun da la natira augmentà il persunal a trais persunas, e l'incumbensa era d'elavurar - en collavuraziun cun ils posts cumpetents federals - ils differents inventaris da biotops (palids autas e palids planivas, ognas, plazzas da fregar per amfibis e pli tard prada sitga) sco er spezialmain l'inventari da cuntradas da palì e da realisar tals projects en stretga collavuraziun cun las vischnancas. Questa lavur fitg minuziusa e pretensiusa ha dumagnà Georg Ragaz cun success.
Ils ultims onns è Georg Ragaz sa deditgà spezialmain ad accumpagnar las iniziativas per novs parcs natirals en il chantun sco er a realisar la protecziun da la natira en l'agricultura. Gronds merits ha el ultra da quai en connex cun revitalisaziuns da zonas umidas pli grondas en la Val Mesauc, en l'Engiadina bassa sco er en la Val Müstair. Medemamain cun grond success è el s'engaschà instancablamain per midar il traject da la loipa tras il guaud da Staz e proteger uschia la palì auta la pli gronda dal Grischun.
Georg Ragaz è adina sa stentà da chattar soluziuns che vegnan acceptadas da la gereralitad e d'accordar ils interess da l'economia - e qua spezialmain dal turissem - cun las finamiras da la protecziun da la natira e da la cuntrada. Grazia a sia forza persvasiva ed a sia cumpetenza professiunala sa Georg Ragaz intermediar exemplaricamain fatgs complexs, e quai uschia che tut las persunas pertutgadas chapeschan. Cun sia sensibilitad, ma er cun sia perspicacitad al èsi reussì da gudagnar respect tant tar las vischnancas e tar las interpresas da l'economia sco er tar las protecturas e tar ils protecturs da la natira. Grazia a sia prudientscha ed a ses engaschament ha el pudì evitar conflicts e cuntraversas giudizialas.
Georg Ragaz ha fatg lavur considerabla per la protecziun da la natira e da la cuntrada en il Grischun ed ha gronds merits areguard il svilup dal territori ed areguard in maletg intact da la cuntrada en noss chantun. Jau engraziel Georg Ragaz er en num da la regenza per ses engaschament instancabel e plain responsabladad e giavisch per l'avegnir ad el ed a sia famiglia buna sanadad e bler plaschair da viver.

Cusseglier guvernativ Claudio Lardi, departament d'educaziun, cultura e protecziun da l'ambient

Gremi: departament d'educaziun, cultura e protecziun da l'ambient
Funtauna: rg departament d'educaziun, cultura e protecziun da l'ambient