Navigation

Inhaltsbereich

  • Erste Mitteilung
  • Neuen Beitrag einfügen
Il chantun Grischun vul augmentar la valur agiuntada en l'economia da laina. Per quel intent duai vegnir stgaffida in'organisaziun grischuna per commerzialisar la laina che coordinescha las activitads da las differentas proprietarias e dals differents proprietaris da guad sco er da las purschidras e dals purschiders da laina. La regenza grischuna ha approvà in project correspundent ch'è vegnì elavurà da l'uffizi forestal dal Grischun e da la federaziun forestala dal Grischun SELVA. Il project "Il Grischun sco martgà da laina radunda - project inizial 2007" fa quint cun custs da 150'000 francs. Da quels surpiglia il chantun 50'000 francs.
La finamira principala dal project è d'augmentar l'utilisaziun da la laina e la valur agiuntada en l'economia da laina. Cun ina cumparsa cuminaivla da las proprietarias e dals proprietaris da guad sco purschidras e sco purschiders da laina pon las schanzas vegnir tratgas a niz optimalmain. Il project prevesa da metter en pe in'organisaziun grischuna per commerzialisar la laina che tegna quint da las relaziuns en il Grischun. Quai vul dir concret ch'i duai vegnir endrizzà in post central tar la federaziun forestala dal Grischun SELVA che coordinescha la commerzialisaziun da la laina ensemen cun las gestiunarias e cun ils gestiunaris regiunals da bursas da laina. Quest post porscha a las proprietarias ed als proprietaris da guad sco er a las purschidras ed als purschiders da laina servetschs integrals en connex cun la vendita da laina e pussibilitescha ad ellas ed ad els in access simpel a cundiziuns da preferenza da cumpradras e da cumpraders a l'engrossa. Questa organisziun nova duai sa limitar l'emprim ad intermediar laina radunda e betg a commerzialisar sezza tala. La finamira è che questa organisaziun grischuna per commerzialisar la laina intermedieschia successivamain almain 200'000 meters cubics laina radunda dal Grischun.

L'ordinaziun davart las elecziuns dal cussegl naziunal vegn adattada
En vista a las elecziuns dal cussegl naziunal dals 21 d'october 2007 ha la regenza grischuna adattà differentas disposiziuns da l'ordinaziun davart las elecziuns dal cussegl naziunal. Quai è necessari perquai che tut las vischnancas dovran per l'emprima giada in program da computer per registrar e per transmetter ils resultats a chaschun da las proximas elecziuns dal cussegl naziunal. Uschia na basegnan las vischnancas pli nagins formulars da dumbraziun prestampads. I croda er la transmissiun dals resultats per telefon a la chanzlia chantunala, sco ch'ella è vegnida fatga fin ussa. Plinavant sa tracti er d'adattar tscherts renviaments d'autras disposiziuns ch'èn surpassads, e quai al dretg surordinà ch'è vegnì midà en il fratemp. L'ordinaziun da la regenza davart las elecziuns dal cussegl naziunal regla dumondas organisatoricas e dumondas areguard la procedura da las elecziuns dal cussegl, uschenavant che las disposiziuns correspundentas dal dretg federal surlaschan als chantuns da reglar la procedura.

Fixà las contribuziuns da gestiun e d'investiziun per il traffic public 2007
La regenza grischuna ha fixà las contribuziuns chantunalas 2007 per las interpresas ch'èn activas en il traffic public regiunal. Tut en tut sustegnan la confederaziun ed il chantun nov interpresas da traffic cun contribuziuns da gestiun da circa 180 milliuns francs. La part ch'il chantun sto surpigliar importa circa 30 milliuns francs. Da las contribuziuns da gestiun van circa 130 milliuns francs a la viafier retica (+9% u +11 milliuns francs). Ultra da quai duain vegnir pajadas contribuziuns d'investiziun da circa 80 milliuns francs (+18% u +12 milliuns francs) a la viafier retica. Qua importa la part chantunala 33 milliuns francs.

Da vischnancas e da regiuns
* Claustra-Serneus: Il project "malaura 2005 Claustra, 2. etappa, via da guaud da Rütland" da la vischnanca da Claustra-Serneus vegn approvà. Als custs cun dretg da subvenziun vegn garantida ina contribuziun chantunala da maximalmain 34'200 francs.
* Saas: Il project "malaura 2005 Saas" da la vischnanca da Saas vegn approvà. Als custs cun dretg da subvenziun vegn garantida ina contribuziun chantunala da maximalmain 132'770 francs.
* Filisur: La revisiun totala da la planisaziun locala da la vischnanca da Filisur ch'è vegnida concludida da las votantas e dals votants a las radunanzas communalas dals 23 d'avust e dals 6 da settember 2005 sco er dals 4 e dals 26 d'october 2005 vegn approvada cun differentas correcturas e resalvas.
* Via da colliaziun da San Carlo a Somaino: Sin la via chantunala da colliaziun da San Carlo a Somaino vegn augmentà il pais maximal permess da 7 sin 18 tonnas.
* "14avel giro da velo da trais pajais": A l'organisaziun dal "14avel giro da velo da trais pajais" e dal "race across the Alps" vegn concedida la permissiun d'utilisar las rutas previsas tenor il plan da traject en il chantun Grischun per las cursas dals 22 fin ils 24 da zercladur 2007.

Contribuziuns chantunalas a differentas instituziuns
* Fundaziun "Gott hilft": Cun la resalva da la garanzia da la finanziaziun restanta vegn garantida a la fundaziun "Gott hilft", Zizers, ina contribuziun chantunala da maximalmain 62'000 francs als custs per remplazzar l'ascensur en la chasa da persunas attempadas e da tgira dal center da da geriatria "Serata" a Zizers.
* Observatori fisical-meteorologic Tavau e center da radiaziun mundiala: Las activitads da giubileum da 100 onns da l'observatori fisical-meteorologic Tavau e center da radiaziun mundiala (OFMD/WRC) l'onn 2007 vegn sustegnì cun ina contribuziun da maximalmain 30'000 francs.

Projects da vias
La regenza ha approvà en tut 434'000 francs per montar las signalisaziuns passivas da las vias da fugia en differents tunnels da las vias naziunalas A13 ed A28 sco er da la via sursilvana.

Chanzlia chantunala dal Grischun

Gremi: regenza
Funtauna: rg chanzlia chantunala dal Grischun
Neuer Artikel