Il schef da l'armada è sa scuntrà ier a Cuira cun il president da la
regenza dal chantun Grischun per in discurs. Il tema principal da la
scuntrada è stà il concept davart il staziunament da l'armada. Il
president da la regenza ha sustegnì la proposta da la citad da Cuira che
prevesa che l'armada surdettia ina part da l'areal da la caserna e da la
plazza da tir per lung da la Rossbodenstrasse e da la Sommeraustrasse a
la citad da Cuira.
Ier glindesdi, ils 26 da favrer 2007, èn sa scuntrads a Cuira il
schef da l'armada, cumandant da corp Christophe Keckeis, il president da
la regenza dal chantun Grischun, Martin Schmid, cun cun lur
collavuraturs ad in discurs informal. A la scuntrada èn sa participads
er il president da la citad da Cuira, Christian Boner, ed il president
communal da Valragn, Markus Stoffel. Ultra da l'infurmaziun davart la
nova regulaziun da las cumpetenzas en il chantun è il cuntegn principal
dal discurs per il chantun stà en spezial il concept davart il
staziunament da l'armada.
En il rom d'in clima da discurs constructiv ed avert han ils
participants pudì preschentar detagliadamain lur posiziuns.
Malchapientschas dal passà han pudì vegnir eliminadas cun questa
chaschun ed ins ha pudì metter la basa per la collavuraziun futura. Sin
basa da la situaziun rectifitgada èn ils represchentants da la citad e
dal chantun sa declerads pronts da sustegnair la realisaziun dal concept
da staziunament. Da l'autra vart ha l'armada garantì d'integrar las
vischnancas tar la realisaziun respectivamain tar l'optimaziun dal
concept da staziunament. En quest connex duai cunzunt la grevezza per la
populaziun da Cuira e da ses conturns vegnir reducida tant sco pussaivel
ad ina mesira supportabla. Ultra da quai èn ils represchentants da
l'armada sa declerads pronts d'examinar las propostas da la citad da
Cuira en il sectur da l'areal da la caserna e da la plazza da tir dal
Rossboden en connex cun il concept d'utilisaziun. Per las optimaziuns
ch'èn necessarias en connex cun la realisaziun dal concept da
staziunament è d'ina vart vegnì concludì d'installar ina gruppa da lavur
communabla ed èn da l'autra vart vegnidas designadas persunas da contact
cumpetentas tar l'armada, tar il chantun e tar las vischnancas.
La finala han ins concludì che las delegaziuns sa scuntrian puspè
durant l'emprim mez onn, e quai per discutar detagliadamain dumondas en
connex cun ils plans per optimar il concept da staziunament - cunzunt
las propostas da la citad da Cuira en il sectur da l'areal da la caserna
e da la plazza da tir dal Rossboden - sco er per elavurar la basa da
decisiun per ils posts cumpetents.
Persunas che dattan infurmaziuns:
- president da la regenza Martin Schmid, schef dal departament da
giustia, segirezza e sanadad, tel. 081 257 25 01
- Felix Endrich, schef d'infurmaziun da la defensiun/pledader da
l'armada, tel. 031 323 21 15
Gremi: departament da giustia, segirezza e sanadad
Funtauna: rg departament da giustia, segirezza e sanadad