Cun differentas mesiras vul il chantun Grischun promover vinavant il martgà public da muvel da maz. Per quest intent ha la regenza grischuna incumbensà l'intermediaziun grischuna da muvel SA cun l'organisaziun dals martgads publics da muvel da maz sco er cun ulteriuras incaricas. Per questas incumbensas indemnisescha il chantun l'intermediaziun grischuna da muvel SA cun ina contribuziun da basa da 120'000 francs e cun ina contribuziun per mintga animal commerzialisà, e quai da 15 francs per mintga arment e dad 1.50 francs per mintga nursa. Da nov duai la commerzialisaziun da muvel da maz sin martgads publics vegnir promovida cun contribuziuns da cumpensaziun per il transport empè cun ina contribuziun per mintga animal. Per quest intent stattan a disposiziun 300'000 francs. La finala paja il chantun ina contribuziun da 50'000 francs per ils custs per sviluppar ina bursa da muvel da niz e da muvel da maz. Per promover la vendita da muvel da maz ha la regenza concedì en tut l'onn 2007 contribuziuns dad 1.1 milliuns francs per la vendita d'arments e da 160'000 francs per la vendita da nursas.
Dapi l'onn 1959 promova il chantun la commerzialisaziun d'animals da maz sin martgads publics cun contribuziuns. En il fratemp hai dà grondas midadas sin il martgà da muvel da maz. Oz vegnan vendids anc 20 pertschient dals animals sur il martgà public. Tuttina gioga il martgà public ina rolla impurtanta, cunquai ch'el è in'alternativa al commerzi privat.

La regenza beneventa la participaziun da la Svizra a l'agentura europeica per la cooperaziun als cunfins exteriurs
La regenza grischuna beneventa la participaziun da la Svizra a l'agentura europeica per la cooperaziun operativa als cunfins exteriurs (FRONTEX). Che la Svizra sa participeschia a la FRONTEX e ch'ella surpiglia l'ordinaziun correspundenta saja - sco che la regenza scriva en sia consultaziun a la confederaziun - senza dubi indispensabel.
L'agentura coordinescha la cooperaziun operativa dals stadis en il sectur da la protecziun dals cunfins exteriurs da l'uniun europeica. Plinavant sustegna ella ils stadis tar la scolaziun da las guardias da cunfin ed analisescha las ristgas. La finala gida ella en cas d'acziuns communablas da respediziun ed en cas da situaziuns che pretendan in'assistenza tecnica ed operativa pli gronda als cunfins exteriurs.
Il chantun Grischun è pertutgà da l'ordinaziun correspundenta mo a l'ur e vegn a pudair profitar mo pauc da las prestaziuns da l'agentura. D'ina vart dispona il Grischun d'in cunfin exteriur da Schengen sulettamain a la plazza aviatica da Samedan. Da l'autra vart po il chantun sa participar ad eventualas acziuns da respediziun communablas; la participaziun a talas acziuns è voluntara ed expulsiuns directas vegnan ad esser pussaivlas er vinavant sco quai ch'igl è sa cumprovà.

Da vischnancas e da regiuns
- Pignieu: Per ils custs per sanar la rait da vias champestras vegn garantida a la vischnanca da Pignieu ina contribuziun chantunala da maximalmain 196'560 francs.
- Tumegl: La revisiun parziala da la planisaziun locala da la vischnanca da Tumegl, ch'è vegnida concludida ils 26 da matg 2006, vegn approvada.
- Castasegna: La revisiun parziala da la constituziun communala da la vischnanca da Castasegna, ch'è vegnida concludida da la radunanza communala dals 12 da december 2006, vegn approvada.
- Alvagni: Ils statuts da la vischnanca burgaisa d'Alvagni dals 2 da favrer 2007 vegnan approvads.
- Tarasp: La revisiun parziala dals statuts da la vischnanca burgaisa da Tarasp, ch'è vegnida concludida ils 19 da december 2006, vegn approvada.
- Giuvaulta: Il reglament per las zonas da protecziun ed il plan da las zonas da protecziun a la scala 1:1'000 per la funntauna minerala "Swiss Alpina" vegnan approvads. Quest reglament e quest plan eran vegnids relaschads da la suprastanza communala da Giuvaulta ils 15 da zercladur 2006.
- "Swiss-Bike-Masters": A l'organisaziun dal "Swiss-Bike-Masters" vegn concedida la permissiun da duvrar la ruta previsa en il territori dal Partenz a chaschun da las cursas dals 21 e dals 22 da fanadur 2007.

Contribuziuns chantunalas a differentas instituziuns
- Promoziun da la cultura: La regenza ha concedì contribuziuns da totalmain 339'500 francs per promover 19 occurrenzas ed ovras culturalas.
- Fundaziun Alfred Escher: L'elavuraziun e l'ediziun dal tom "Viafier alpina" en il rom dal project per edir las brevs dad ed ad Alfred Escher sco er ulteriuras funtaunas dal 19avel tschientaner en il context dad Escher, e quai tras la fundaziun Alfred Escher, vegn sustegnida cun ina contribuziun da 50'000 francs.
- Visarte.grischun: Per sustegnair l'atelier "Fernando et Jean-Luc Lardelli, Canton des Grisons Paris" survegn la visarte.grischun ina contribuziun da stipendi da 20'000 francs per l'onn 2007.

Projects da vias
La regenza ha approvà totalmain 750'000 francs per construir e per sanar il suandant traject da via:
- via da la Calanca, Bodio - Cauco: lavurs d'impressari

Chanzlia chantunala dal Grischun

Gremi: regenza
Funtauna: rg chanzlia chantunala dal Grischun