La regenza grischuna è per gronda part d'accord cun la revisiun da la lescha federala davart l'assicuranza d'accidents (LAA) che vegn proponida da la confederaziun. La LAA regla l'assicuranza da las lavurantas e dals lavurants cunter accidents da lavur, cunter malsognas da lavur sco er cunter accidents ordaifer la professiun. Tras la revisiun duai la LAA vegnir adattada a las pretensiuns d'ina assicuranza sociala moderna. In punct central da la revisiun è quel da restar tar il monopol parzial da la SUVA. En sia consultaziun po la regenza ir d'accord cun l'opiniun dal cussegl federal. Tras la revisiun na duain las instituziuns responsablas multiplas betg vegnir midadas tras il monopol parzial da la SUVA, perquai che quellas sajan numnadamain sa cumprovadas, sco che la confederaziun explitgescha.
La revisiun è dividida en duas parts. L'emprima part concerna adattaziuns da la lescha en general. En quest connex sustegna la regenza l'augment dal grad da l'invaliditad minimala per retrair ina renta d'invaliditad, e quai da 10 a 20 pertschient. Er la finamira d'ina meglra coordinaziun da las rentas da la AI cun rentas che vegnan pajadas d'autras purtadras e d'auters purtaders da prestaziuns vegn sustegnida cleramain. I duai vegnir evità che la summa da las prestaziuns da la AI d'ina persuna saja pli gronda che quai che l'indemnisaziun fiss en il cas che quella persuna na fiss betg invalida. La regenza beneventa er las propostas per reorganisar la SUVA che vegnan fatgas en la segunda part dal project. En quest connex s'exprima ella per la varianta che garantescha a l'institut ina tscherta independenza.
Crititgadas vegnan dentant las novas activitads accessoricas da la SUVA - sco servetschs per ils fatgs da la sanadad, la cussegliaziun e la scolaziun en il sectur da la promoziun da la sanadad en il manaschi - che duain vegnir integradas en la lescha. Tenor la regenza banduna la SUVA ses champ d'activitad sco tal tras questa nova regulaziun, numnadamain la prevenziun d'accidents da lavur e da malsognas da lavur, e surpiglia incumbensas executivas en il sectur da la lescha da lavur. Uschia daventa la SUVA activa en ina champ d'incumbensas ch'è suttamess a la confederaziun ed als chantuns. En vista als sforzs ch'ils chantuns fan per distgargiar administrativamain las interpresas pitschnas e mesaunas (IPM) è la regenza surprendida da stuair prender enconuschientscha che la confederaziun recumonda da crear talas structuras parallelas.

Da vischnancas e da regiuns
- Pitasch: Il project "via da guaud Uaul Verd" da l'associaziun da meglieraziun da Pitasch vegn approvà. Als custs vegn garantida ina contribuziun chantunala da maximalmain 237'500 francs.
- Ramosch: Il project "via da guaud Erms" da la vischnanca da Ramosch vegn approvà. Als custs vegn garantida ina contribuziun chantunala da maximalmain 83'600 francs.
- Flond: A la vischnanca da Flond vegn garantida ina contribuziun da 139'285 francs per engrondir e per renovar la serenera.
- Flem: La revisiun parziala da la planisaziun locala da la vischnanca da Flem, ch'era vegnida concludida ils 26 da november 2006, vegn approvada.
- Sagogn: La revisiun parziala da la planisaziun locala da la vischnanca da Sagogn (areal da la basa principala), ch'era vegnida concludida ils 15 da december 2006, vegn approvada.
- Pendicularas Breil-Vuorz-Andiast SA: En sia consultaziun a l'uffizi federal da traffic davart la dumonda da concessiun da las pendicularas Breil-Vuorz-Andiast SA dals 19 da december 2006 per construir ina sutgera accuplabla da quatter "Alp Dado - Fil da Rubi" (implant da remplazzament) propona la regenza da dar la concessiun.

Contribuziuns chantunalas a differentas instituziuns
- Fundaziun ARGO: A la ARGO, la fundaziun "center grischun per lavuratoris e dimoras da persunas impedidas", vegn garantida ina contribuziun maximala da 353'500 francs als custs per cumprar in'abitaziun a Cuira cun l'intent d'installar là ina scola cun la pussaivladad d'abitar.
- Tgira da monuments: Per restaurar e per sanar la baselgia catolica a Sour, la chaplutta da son Niclà a Rueun, la punt da Solas ad Alvaschagn sco er la chasa d'abitar nr. 105 a Mesauc-Crimeo ha la regenza approvà 275'300 francs.
- Teater Cuira: Per la segunda part da la stagiun 2006/2007 (enviern/primavaira 2007) survegn il teater Cuira ina contribuziun chantunala en l'autezza da 150'000 francs.
- Societad da musica Cinuos-chel/Brail: A la societad da musica da Cinuos-chel/Brail vegn concedida ina contribuziun maximala da 13'500 francs per ina nova instrumentaziun.
- Fundaziun "concurrenza svizra da musica per la giuventetgna": A la fundaziun "concurrenza svizra da musica per la giuventetgna" vegn concedida per l'onn 2007 ina contribuziun da 5'200 francs.
- Associaziun grischuna da ballape: Per sa participar al turnier da ballape dals gieus da la ARGE ALP 2007 a Bulsaun/Tirol dal sid survegn l'associaziun grischuna da ballape ina contribuziun dad 8'000 francs or dal fond da sport.

Projects da vias
La regenza ha approvà totalmain 582'000 francs per construir e per sanar il suandant traject da via:
- via da St. Antönien: lavurs d'impressari, dustanza dal Schanielabach

Chanzlia chantunala dal Grischun

Gremi: regenza
Funtauna: rg chanzlia chantunala dal Grischun