Anc fin ils 31 da mars 2007 dura la concurrenza per il premi da la ARGE ALP 2007. Sut il titel "giuven, cool ed engaschà" vegnan tschertgadas ideas e propostas innovativas, cun las qualas ins po gudagnar giuvenils per uffizis d'onur. Sco summa totala dals premis stattan a disposiziun 15'000 euros.

Suenter ils onns 2002 e 2004 publitgescha la cuminanza da lavur da las regiuns alpinas (ARGE ALP) gia per la terza giada il premi da renconuschientscha e da promoziun. Quest onn sa drizza quel en spezial a citads, a vischnancas, ad uniuns ed a scolas (cun scolaras e cun scolars a partir da 10 onns) dals pajais ch'èn commembers da la ARGE ALP. Quai èn ils chantuns Grischun, Son Gagl e Tessin, ils stadis federativs Tirol, Salzburg e Vorarlberg, las provinzas autonomas Trento e Bulsaun-Tirol dal sid, la regiun Lumbardia ed il stadi liber da la Baviera. Las participantas ed ils participants èn envidads da preschentar ideas e projects innovativs che motiveschan e che fascineschan umans giuvens da s'engaschar en in uffizi d'onur. Admess èn projects realisads (a partir da l'onn 2004) sco er ideas e concepts per il futur.

Il termin d'annunzia dura anc fin ils 31 da mars 2007. Giurias regiunalas tschernan alura las meglras contribuziuns da lur territori e tramettan vinavant quellas ad ina cumissiun internaziunala per la decisiun finala. Totalmain pon ins gudagnar 15'000 euros. La surdada dals premis ha lieu il zercladur 2007 a Bregenz a chaschun da la conferenza da las scheffas e dals schefs da las regenzas.

Ils documents detagliads davart la concurrenza ed ulteriuras infurmaziuns stattan a disposiziun en l'internet sut www.argealp.org. Contribuziuns dal chantun Grischun pon vegnir tramessas a la chanzlia chantunala dal Grischun, servetsch da medias, Reichsgasse 35, 7001 Cuira.

Ulteriuras infurmaziuns:
- Il flyer po vegnir chargià qua giu da l'internet.

Gremi: ARGE ALP, sutgruppa per la lavur da publicitad
Funtauna: rg chanzlia chantunala dal Grischun