Dal puntg da vista da l'economia publica beneventa la regenza grischuna la revisiun parziala da la lescha federala davart las barrieras tecnicas per il commerzi. Questa revisiun prevesa la renconuschientscha unilaterala da products mess en circulaziun en la UE. Cun l'access simplifitgà al martgà indigen presuman ins che la concurrenza vegnia animada, scriva la regenza en sia consultaziun a la confederaziun. Cun la revisiun duai l'instrumentari existent per eliminar barrieras tecnicas per il commerzi vegnir cumplettà cun in instrument supplementar, numnadamain cun il princip da Cassis-de-Dijon. Uschia duain products che vegnan mess en circulaziun legalmain en la UE respectivamain en il SEE pudair circular libramain er en Svizra.
Per che l'avantatg che l'economia publica ha en connex cun il project na vegnia betg restrenschì memia fitg, pretenda la regenza in'execuziun concisa ed adattada per la pratica. La surveglianza dal martgà sto vegnir concepida en moda uschè simpla sco pussaivel. Medemamain vegn beneventada la regulaziun cunter la discriminaziun da producentas e da producents svizzers. Tenor il sboz èsi previs che er las producentas ed ils producents svizzers dastgian far e metter en circulaziun lur products en Svizra tenor las prescripziuns che valan en la UE, sch'ils products vegnan mess en circulaziun legalmain er en il stadi correspundent da la UE, dal qual els adempleschan las prescripziuns. Per la regenza è la problematica da la discriminaziun indigena in aspect central dal project. Quella po vegnir evitada mo sch'i vegn permess a las producentas ed als producents svizzers - e quai independentamain sch'ils products vegnan exportads u betg - da producir e da metter en circulaziun lur products en Svizra tenor las medemas pretensiuns che valan per ils products d'import che vegnan admess sin basa dal princip da Cassis-de-Dijon.
La regenza refusa dentant la disposiziun, tenor la quala las autoritads cumpetentas da la confederaziun e dals chantuns stuessan resguardar las sentenzias e la pratica da la curt europeica e da la cumissiun europeica. Quai stgaffiss in cas da precedenza concernent il resguard da sentenzias d'instanzas da l'exteriur. Questa disposiziun n'è tenor la regenza betg necessaria, perquai ch'il project n'introducescha betg il princip da Cassis-de-Dijon - ch'è vegnì sviluppà en la UE - en l'urden giuridic svizzer, ma el prevesa unicamain la renconuschientscha unilaterala da products ch'èn vegnids fatgs tenor prescripziuns da l'exteriur.

La reordinaziun da las cumissiuns extraparlamentaras vegn da princip beneventada
La regenza grischuna approvescha la reordinaziun da las cumissiuns extraparlamentaras che vegnan proponidas da la confederaziun, dentant cun tschertas resalvas. Sco quai che la regenza explitga en sia consultaziun en connex cun la lescha davart l'organisaziun da la regenza e da l'administraziun po ella da princip sustegnair las finamiras da la nova regulaziun.
La nova regulaziun prevesa disposiziuns davart l'intent e davart la premissa per constituir u per nominar cumissiuns extraparlamentaras. Fixadas vegnan: ina obligaziun d'examinar la necessitad da las cumissiuns, las incumbensas e la cumposiziun sco er la publicaziun da las relaziuns cun gruppas d'interess e da las indemnisaziuns. Las disposiziuns legalas previsas duain cuntanscher uschia in'optimaziun constanta da las cumissiuns e porscher dapli transparenza.
La regenza n'è dentant betg d'accord cun l'interpretaziun che la chanzlia federala fa en las explicaziuns tar il project da consultaziun. Tenor quellas duai la collavuraziun dals chantuns succeder en emprima lingia tras l'instrument da la procedura da consultaziun. La lavur da las cumissiuns extraparlamentaras ha er il caracter d'ina cundecisiun dal cuntegn. Quella è fitg impurtanta per ils chantuns, perquai ch'els pon uschia communitgar lur tenuta areguard las directivas da la politica federala gia en il stadi tempriv. Uschia pon cumissiuns extraparlamentaras surpigliar ina rolla impurtanta en la collavuraziun colleghiala tranter la confederaziun ed ils chantuns.

Contribuziuns chantunalas a differentas instituziuns
- Club da sport Stussavgia: Il club da sport Stussavgia survegn ina contribuziun or dal fond da sport dad 8'800 francs per l'acquist da bandas da hockey.

Projects da vias
La regenza ha approvà totalmain 4'888'000 francs per construir e per sanar ils suandants trajects da via:
- via d'Avras: Rofla - Juf, lavurs d'impressari per la punt dal Reno di Lei
- via sursilvana da la vart dretga dal Rain: lavurs d'impressari Castrisch - Glion
- via da Breil: lavurs d'impressari e lavurs da cuvrida en il vitg da Breil
- via sursilvana: lavurs d'impressari e lavurs da cuvrida Garmischeras - Tscheppa

Gremi: regenza
Funtauna: rg chanzlia chantunala dal Grischun