Oz suentermezdi ha gì lieu ina discussiun tranter la vischnanca da Valzeina, il president da la regenza Martin Schmid sco er ina represchentanza da l'uffizi da fatgs da polizia e da dretg civil davart la chasa da dimora per requirentas e per requirents d'asil "Flüeli". En il rom da questa discussiun ha il president da la regenza Martin Schmid preschentà anc ina giada ils motivs per l'elecziun da quest object a la represchentanza da la vischnanca da Valzeina. Il medem mument la ha el infurmà davart la decisiun da duvrar il "Flüeli" a partir da questa stad da princip primarmain sco center d'expulsiun. In'avischinaziun dals differents puntgs da vista n'ha betg pudì vegnir cuntanschida.

A questa discussiun davart la chasa da dimora per requirentas e per requirents d'asil ch'è planisada en il "Flüeli" a Valzeina èn sa participads ina represchentanza da la suprastanza communala da Valzeina, il president ed il deputà dal circul da Seewis sco er il president da la regenza Martin Schmid, schef dal departament da giustia, segirezza e sanadad, ed ils represchentants da l'uffizi da fatgs da polizia e da dretg civil dal Grischun, Heinz Brand e Beda Egger.
La represchentanza da la vischnanca da Valzeina ha duvrà la discussiun per preschentar lur motivs da la resistenza cunter la chasa da dimora per requirentas e per requirents d'asil planisada. Il president da la regenza Schmid da sia vart ha infurmà davart ils motivs per l'acquist e per l'utilisaziun futura da l'object sco er davart ils avantatgs da questa chasa da dimora. En quest connex ha el communitgà a la vischnanca che la regenza restia tar sia decisiun da metter en funcziun la dimora en il decurs da la stad, e quai per circa 40 requirentas e requirents d'asil. Il medem mument ha el orientà che quest object vegnia manà en il futur da princip primarmain sco center d'expulsiun per assister e per collocar requirentas e requirents d'asil ch'èn vegnids refusads. L'utilisaziun sco center d'expulsiun prevesa ch'i vegnian collocadas en questa chasa da dimora persunas cun ina procedura d'asil terminada, per las qualas las preparativas per l'expulsiun n'èn anc betg finidas respectivamain n'han anc betg pudì vegnir terminadas. Questas persunas na dastgan - sa basond sin prescripziuns dal dretg federal - betg pli exercitar in'activitad da gudogn. Perquai che l'expulsiun vegn exequida proximamain n'èn er betg pli inditgads ulteriurs pass d'integraziun, damai che la persuna pertutgada po mo pli far quint cun ina dimora curta en Svizra.
Malgrà ils puntgs da vista opposts ha la discussiun gì lieu en in'atmosfera quieta ed objectiva. In'avischinaziun dals differents puntgs da vista n'ha però betg pudì vegnir cuntanschida.
Persuna che dat infurmaziuns:
- president da la regenza dr. Martin Schmid, schef dal departament da giustia, segirezza e sanadad, tel. 081 257 25 01
Gremi: departament da giustia, segirezza e sanadad
Funtauna: rg departament da giustia, segirezza e sanadad