La sessiun d'avrigl 2007 vegn la regenza a preschentar al cussegl grond in sboz per la revisiun parziala da la lescha da sanadad dal chantun Grischun. Sut il presidi dal deputà Vincent Augustin ha la cumissiun dal cussegl grond per sanadad e fatgs socials (CSF) predeliberà la missiva da la regenza per mauns dal cussegl grond. Er il president da la regenza Martin Schmid è sa participà a la sesida.
Il punct central dal project è la protecziun da las nunfimadras e dals nunfimaders cunter il fimar passiv. La basa per far las midadas correspundentas da la lescha è ina incumbensa da la CSF ch'è vegnida assegnada dal cussegl grond l'onn 2006. Sco che la regenza scriva en sia missiva, mancan fin oz las disposiziuns legalas che porschan a la populaziun ina protecziun generala cunter il fimar passiv. Cun la revisiun parziala qua avant maun duai questa largia vegnir serrada ussa. En vista a la periclitaziun da la sanadad che vegn chaschunada dal fim da tubac vuless la regenza - per proteger las nunfimadras ed ils nunfimaders cunter il fimar passiv - introducir in scumond general da fimar en localitads serradas ch'èn accessiblas al public. A l'intern ed a l'extern d'areals da scola e d'implants da sport da scola sco er da lieus da scuntrada e da tgira per uffants e per giuvenils duai il fimar vegnir scumandà en general per motivs da la prevenziun. Per manaschis da restauraziun e d'hotellaria signifitgass il scumond proponì ch'i dastgass vegnir fimà mo pli en locals accessorics separads ch'èn marcads correspundentamain. Ina minoritad da la cumissiun vuless extender las disposiziuns correspundentas, uschia ch'i dess en quels locals accessorics separads prestaziuns gastronomicas mo pli en furma d'in autoservetsch.
Ina discussiun detagliada ha er chaschunà la part dal sboz che regla la consegna da medicaments tras las medias e tras ils medis - che n'han nagina apoteca privata - durant e suenter l'emprim provediment. Ina minoritad da la cumissiun vuless mantegnair la regulaziun vertenta en quest punct, entant ch'ina maioritad da la cumissiun suonda la missiva. Tenor quella dastga la media u il medi consegnar - suenter la consultaziun - per mintga diagnosa mo il pachetin original il pli pitschen d'in medicament.
Ulteriurs puncts da la revisiun pertutgan l'introducziun d'ina obligaziun d'accoglientscha dals ospitals privats e da las clinicas privatas, in'obligaziun da dumandar ina permissiun da manar ils ospitals publics sco er il scumond da cultivar spezias da chonv ch'èn adattadas per vegnir consumadas sco narcotics.
Suenter avair discutà il project en moda intensiva e cuntraversa propona la cumissiun al cussegl grond unanimamain d'entrar en il project e da deliberar il sboz da lescha cun tschertas midadas.

Persuna che dat infurmaziuns:
Vincent Augustin, cumissiun per sanadad e fatgs socials, tel. 081 258 55 25

Gremi: cumissiun per sanadad e fatgs socials
Funtauna: rg cumissiun per sanadad e fatgs socials