Sut il presidi dal deputà Bruno W. Claus ha la cumissiun dal cussegl grond per furmaziun e cultura (CFC) predeliberà per mauns dal cussegl grond la missiva da la regenza tar la revisiun totala da la lescha chantunala davart la furmaziun professiunala. A las sesidas da la cumissiun è sa participà er il cusseglier guvernativ Claudio Lardi. La cumissiun propona unanimamain al cussegl grond d'entrar en il project e da deliberar il sboz da la lescha cun paucas midadas.
La revisiun da questa lescha è necessaria, perquai che la nova lescha federala davart la furmaziun professiunala (LFPr), ch'è en vigur dapi il 1. da schaner 2004, prescriva che las ordinaziuns chantunalas e federalas vertentas davart la furmaziun stoppian vegnir adattadas respectivamain remplazzadas entaifer tschintg onns. La midada concernent la finanziaziun - vul dir la midada a contribuziuns pauschalas als chantuns - vegn exequida gia entaifer quatter onns. Quai signifitgescha che las novas disposiziuns da finanziaziun da la confederaziun entran en vigur il 1. da schaner 2008. In basegn d'agir resulta er pervia da la nova concepziun da la gulivaziun da finanzas e da las incumbensas tranter la confederaziun ed ils chantuns (NGF).
La nova lescha surpiglia da princip la finanziaziun tenor las proceduras vertentas. En consequenza da la reordinaziun da la gulivaziun da finanzas e da la repartiziun da las incumbensas tranter il chantun e las vischnancas (LGF II) sto - tenor l'avis da la CFC - vegnir sclerida en in connex general la dumonda concernent la confinanziaziun da la furmaziun professiunala tras las vischnancas. La lescha dat dentant er la pussaivladad da midar a la nova finanziaziun pauschala.
La CFC è s'occupada detagliadamain cun las consequenzas da questa finanziaziun pauschala ed è - sco la regenza - da l'avis ch'i na dastgassan resultar nagins dischavantatgs per la furmaziun professiunala en il chantun Grischun tras questa midada da sistem. Il project resguarda quest fatg impurtant.
La CFC cumplettescha la nova lescha cun disposiziuns che distgargian ils manaschis d'emprendissadi. La lescha chantunala davart la furmaziun professiunala pussibilitescha da promover la furmaziun supplementara professiunala er en l'avegnir. Tras quest sboz da lescha consolideschan e promovan la regenza ed il cussegl grond la gronda impurtanza da la scolaziun professiunala en il chantun Grischun. Il cussegl grond vegn a tractar quest project durant la sessiun d'avrigl 2007.
La tractativa da la missiva da la regenza concernent la participaziun dal chantun a la sanaziun finanziala da la "HTM immobiglias SA" ha la cumissiun spustà sin ina sessiun posteriura per anc pudair sclerir dumondas avertas per mauns dal cussegl grond. Oriundamain era er questa tractativa previsa per la sessiun d'avrigl 2007.

Persuna che dat infurmaziuns:
Bruno W. Claus, cumissiun per furmaziun e cultura, tel. 081 250 70 25

Gremi: cumissiun per furmaziun e cultura
Funtauna: rg cumissiun per furmaziun e cultura