La cassa da pensiun chantunala dal Grischun duai daventar independenta e survegnir dapli autonomia. Sco furma giuridica propona la regenza grischuna da transfurmar la cassa da pensiun chantunala en in institut autonom da dretg public. La regenza ha deliberà la missiva correspundenta concernent la revisiun parziala da la lescha davart la cassa da pensiun chantunala dal Grischun per mauns dal cussegl grond, il qual tracta la fatschenta en la sessiun da zercladur 2007. La lescha duai entrar en vigur il 1. da schaner 2008.
A chaschun da la revisiun totala da l'ordinaziun davart la cassa da pensiun l'onn 2000 aveva il cussegl grond concludì la finanziaziun restanta e l'independenza giuridica da la cassa da pensiun chantunala dal Grischun (CP). Igl era previs da surdar l'independenza giuridica ed organisatorica a la CP sco er d'abolir la garanzia chantunala per il cumenzament da l'onn 2012. Suenter che la finanziaziun restanta da la CP ha pudì vegnir terminada gia l'onn 2005 e betg sco previs oriundamain durant ils onns 2005 fin 2011, daventa l'independenza giuridica ussa pussaivla pli baud. Cun la missiva actuala vegn pia realisà sulettamain quai ch'il cussegl grond aveva fixà avant plirs onns en vista a la finanziaziun restanta da la cassa.
Ils puncts centrals da la revisiun èn la determinaziun dal subject giuridic, la nova definiziun dal circul da las persunas assicuradas e la fixaziun dal grad d'autonomia da la CP. Organisatoricamain è la CP oz in institut dependent da dretg public ed è suttamessa sco post da servetsch al departament da finanzas e vischnancas. A favur d'ina cassa da pensiun independenta pledan - tenor la regenza - cunzunt motivs giuridics, motivs da manaschi e motivs dal dretg da responsabladad. Ina furma organisatorica giuridicamain independenta correspunda er a l'idea fundamentala da la lescha federala davart la prevenziun professiunala per vegliadetgna, survivents ed invaliditad (LPP) che prevesa ina separaziun giuridica tranter la patruna u il patrun e l'instituziun da prevenziun.
Il manaschi da la cassa da pensiun è gia oz per gronda part independent. Uschia vegnan liquidadas las fatschentas d'assicuranza en atgna responsabladad e las investiziuns da chapital vegnan fatgas independentamain. Tras l'independenza giuridica survegn la CP er formalmain il spazi d'agir sco interpresa, uschia ch'ella po sa preschentar cun success sin il martgà. A medem temp resta dentant la pussaivladad dal chantun da far valair sia influenza sco legislatur. En quai che reguarda il circul da las persunas assicuradas ston da nov vegnir assicurads obligatoricamain las collavuraturas ed ils collavuraturs dal chantun e da ses instituts autonoms. Las collavuraturas ed ils collavuraturs da la banca chantunala grischuna, da las vischnancas, da las corporaziuns da vischnancas e da las dretgiras districtualas pon vegnir assicurads facultativamain.

Gremi: regenza
Funtauna: rg chanzlia chantunala dal Grischun