L'edifizi dal lieu da lavur e d'occupaziun ARBES dals servetschs psichiatrics dal Grischun a Giuvaulta duai vegnir engrondì ed adattà. Per realisar quest project da construcziun dumonda la regenza grischuna il cussegl grond da conceder in credit d'impegn da 2,6 milliuns francs. La regenza ha deliberà la missiva correspundenta per mauns dal cussegl grond. Quel vegn a tractar questa fatschenta en la sessiun da zercladur 2007.
Il lieu da lavur e d'occupaziun ARBES a Giuvaulta è vegnì mess en funcziun l'onn 1995. La purschida cumpigliava da quel temp 56 plazzas da lavur ed è vegnida concepida per dar lavur a las 64 persunas staziunaras che abitavan en la chasa da dimora. Dapi lura è la dumonda da plazzas da lavur protegidas per umans cun in impediment psichic creschida constantamain. Ils ultims onns aveva la ARBES in grad d'occupaziun da passa 110 pertschient. Il medem mument èn er sa midadas decisivamain las pretensiuns a las plazzas da lavur protegidas. Empè da dar in'occupaziun simpla a las persunas che vivan a Giuvaulta vegn ozendi empruvà cun activitads productivas che las persunas cun impediments possian s'integrar en ina professiun. Ils secturs d'occupaziun da la ARBES che stattan a disposiziun tant a las persunas che abitan en la chasa da dimora sco er a clientas ed a clients externs cumpiglian l'elavuraziun da crappa, ina scrinaria, ina stamparia ed in'orticultura.
La gronda occupaziun da la ARBES chaschuna bleras stretgas tar las localitads. Gia l'onn 2002 era vegnì planisà in engrondiment. Pervia dal pachet da mesiras per sanar las finanzas dal chantun ch'il cussegl grond aveva concludì l'onn 2003 han ils engrondiments da l'edifizi stuì vegnir suspendids per il mument ed il basegn da localitads supplementaras ha stuì vegnir cuntentà ad interim cun containers da plazzals.
Cun il nov project adattà duai la purschida actuala da 56 plazzas da lavur vegnir augmentada da nov sin 68 plazzas da lavur. Cun quai survegnan supplementarmain circa 15 umans cun in impediment psichic ina structura dal di reglada. Planisà èsi da construir in lavuratori nov, in deposit per la laina vi dal lavuratori existent sco er in edifizi nov per l'orticultura. Il project da construcziun prenda resguard da las structuras existentas e cumplettescha quellas cun engrondiments moderads. Grazia ad in barat da terren cun la vischnanca da Giuvaulta resulta in areal cumplain, sin il qual il basegn da spazi po vegnir realisà optimalmain.
Ils custs da construcziun vegnan stimads a 2,6 milliuns francs. La confederaziun ha empermess subvenziuns en l'autezza da circa 800'000 francs. Quella empermischun n'ha dentant anc betg vigur legala. Cun l'engrondiment che la ARBES planisescha po ella ademplir sias incumbensas d'assistenza en lieus da lavur che correspundan als basegns. Uschia èsi garantì ch'i po vegnir lavurà en moda raschunaivla vi d'atgnas producziuns e che plazzas da lavur da nischa pon vegnir mantegnidas. Il concept architectonic multifuncziunal è - tenor la regenza - orientà vers il futur e po vegnir engrondì pli tard senza problems. Il cumenzament da las lavurs da construcziun è previs per il settember 2007 e la stad 2008 duai l'engrondiment vegnir mess en funcziun.

Gremi: regenza
Funtauna: rg chanzlia chantunala dal Grischun