Las organisaziuns da turissem ch'èn sa reunidas ad organisaziuns per la gestiun da destinaziuns (OGD) u che vegnan a sa reunir ad organisaziuns turisticas futuras (OTF) han inoltrà a l'uffizi per economia e turissem per la fin da mars en total 12 skizzas da project. Suenter ils discurs cun las instituziuns ch'èn responsablas per il project vegn decidì la fin da matg davart il sustegn chantunal dal process da refurma per la proxima fasa da project che vegn a durar fin il settember.

Cun la publicaziun dal concept da realisaziun da la refurma dal turissem grischun èn vegnidas envidadas il november passà - en il rom dal project "structuras cumpetitivas e repartiziun da las incumbensas en il turissem grischun" - las organisaziuns da turissem da surpigliar ina rolla activa e da s'annunziar fin la fin da mars tar l'uffizi per economia e turissem cun ina skizza da lur project per il process da refurma. Il project che stat sut la direcziun da cusseglier guvernativ Hansjörg Trachsel ha la finamira da franar il regress da pernottaziuns en il Grischun cun ina nova structura da destinaziuns, cun ina clera repartiziun da las incumbensas en il marketing e cun ina nova orientaziun da Grischun vacanzas.

13 projects da refurma per furmar destinaziuns
En il turissem dal Grischun vegnan elavurads totalmain almain 13 projects per furmar OGD u OTF. La OGD Engiadina San Murezzan ha gia cumenzà cun la realisaziun suenter questa decisiun cardinala dal pievel ed instradescha il 1. da matg uffizialmain sia activitad da fatschenta. Ils projects restants cumpiglian las destinaziuns principalas Tavau - Claustra, Cuira - Arosa - Lai, Flem - Laax (incl. Surselva) sco er Scuol - Samignun (regiun dal parc naziunal). Stentas per furmar u per consolidar ina OTF vegnan fatgas en las suandantas regiuns: Val Bregaglia, Val Puschlav, Val Müstair, San Bernardino/Moesano, Scanvetg, Viamala sco er Savognin-Surses/Val d'Alvra. La ScRL Partenz Turissem è vegnida fundada gia ils 28 da favrer 2007 e mussa che er regiuns pli pitschnas chattan lur plazza en la refurma dal turissem grischun.

Concretisaziun fin l'atun
Ils projects lantschads mussan ch'i na dat naginas largias en il rom da la refurma dal turissem grischun. En tut las vals dal Grischun vegnan elavurads projects che sustegnan las finamiras da la refurma. Ubain che gruppas da lavur èn gia vegnidas furmadas ubain che decleraziuns d'intenziun per furmar structuras da turissem orientadas vers il futur èn almain avant maun. Las tschintg destinaziuns principalas Engiadina San Murezzan, Tavau - Claustra, Cuira - Arosa - Lai, Flem - Laax e Scuol - Samignun giogan qua ina rolla impurtanta sco OGD. Per la fasa da project che dura da l'avrigl fin il settember communitgescha il chantun ses sustegn sin fundament dals criteris dal concept da realisaziun e sin fundament da discurs individuals cun las petentas e cun ils petents fin la fin da matg. Suenter ston las instanzas ch'èn mintgamai responsablas per il project inoltrar lur plan da fatschenta per las novas OGD u OTF, e quai fin la fin da settember. Sin basa dal plan da fatschenta decida il chantun, sch'el sustegna il process da transfurmaziun da las organisaziuns da turissem sco tal, fin che las OGD e che las OTF vegnan lantschadas sin plaun operativ.

Mesiras accumpagnantas
Ultra da la furmaziun da OGD e da OTF en il Grischun ha il chantun la finamira d'introducir a medem temp tschintg mesiras accumpagnantas che caracteriseschan il process da refurma en moda decisiva. Il mument vegn fatga in'examinaziun giuridica ed in'examinaziun areguard il cuntegn d'ina taxa chantunala per promover il turissem (TCT) cun integrar las organisaziuns da tetg da l'economia grischuna. Ina cumissiun separada d'expertas e d'experts è vegnida incumbensada d'elavurar la plattafurma turistica electronica grischuna. Fin la fin da l'onn 2008 duai ella metter il turissem grischun a la testa da la glista turistica che sa chatta en l'internet. Las pussaivladads da commerzialisaziun per il turissem rural en il Grischun vegnan examinadas actualmain dal post spezialisà per turissem e svilup persistent da la scola auta da Wädenswil a Vargistagn. L'ulteriur svilup da la marca graubünden ensemen cun las destinaziuns succeda sut la direcziun da Grischun vacanzas. Ultra da quai vegn etablì en tut las OGD e tar Grischun vacanzas in sistem da direcziun e da monitoring che na pussibilitescha la valitaziun dal success betg mo sin basa da las pernottaziuns, mabain sin basa d'in sistem d'indicaturs equilibrà.

Gremi: departament d'economia publica e fatgs socials
Funtauna: rg uffizi per economia e turissem