Per proteger las nunfimadras ed ils nunfimaders cunter il fimar passiv duai il fimar vegnir scumandà en il Grischun en localitads serradas ch'èn accessiblas al public. En il senn d'ina excepziun duai esser pussaivel da fimar mo pli en localitads separadas per fimadras e per fimaders. La regenza grischuna ha deliberà la missiva correspundenta concernent la revisiun parziala da la lescha da sanadad per mauns dal cussegl grond. Il cussegl grond vegn a tractar quella en la sessiun d'avrigl 2007.
Il fimar passiv è en differents reguards in privel per la sanadad. Fin oz mancan sin plaun chantunal las disposiziuns legalas che protegian la populaziun cunter il fimar passiv. Cun la revisiun parziala da la lescha da sanadad qua avant maun duai questa largia vegnir serrada ussa.
I duai vegnir scumandà da fimar en localitads serradas ch'èn accessiblas al public, quai vul dir er en manaschis da restauraziun e d'hotellaria, sch'i na vegn betg fimà là en localitads separadas per fimadras e per fimaders. Perquai che la protecziun cunter il fimar passiv po vegnir garantida cun localitads separadas per fimadras e per fimaders sco er per nunfimadras e per nunfimaders u cun plazzas per fimadras e per fimaders or en il liber, fiss in scumond da fimar cumplet sproporziunà. La proposta da la regenza prevesa pervia da quai - resguardond ils interess da las fimadras e dals fimaders - da permetter il fimar en localitads separadas. Ultra da quai duain las vischnancas survegnir la pussaivladad d'abolir il scumond da fimar per in manaschi gastronomic, sch'i sa tracta da l'unic manaschi gastronomic da la vischnanca u da la fracziun.
A l'intern ed a l'extern da scolas e da stabiliments da sport da scola sco er da lieus da scuntrada e d'instituziuns da tgira per uffants e per giuvenils duai il fimar vegnir scumandà en general per motivs da la prevenziun. Quest scumond da fimar po vegnir abolì da las vischnancas mo excepziunalmain per occurrenzas che sa drizzan per gronda part a persunas creschidas, sch'i vegn fimà en localitads separadas, che na servan betg a l'instrucziun, u en lieus definids a l'extern.
L'execuziun dal scumond da fimar vegn delegà a las vischnancas. En cas da surpassaments po la persuna che fima vegnir chastiada cun ina multa fin 100 francs, en cas da repetiziun cun ina multa fin 500 francs.
Ultra da quai cuntegna la revisiun parziala da la lescha da sanadad anc autras midadas. Uschia fixescha la lescha tenor la pratica actuala vertenta da princip in scumond da cultivar spezias da chonv ch'èn adattadas per il consum sco narcotics, perquai ch'il consum da narcotics è in privel per la sanadad publica. La regenza po prevair excepziuns e designar las spezias da chonv che dastgan vegnir cultivadas. Realisond la lescha federala davart la transplantaziun d'organs, da tessids e da cellas vegn designà en il project la presidenta u il president da la dretgira districtuala sco instanza independenta che sto approvar la prelevaziun da tessids regenerabels e da cellas regenerablas da persunas che n'èn betg ablas da giuditgar u ch'èn minorennas.
Plinavant vegnan ils causals en la revisiun parziala, tar ils quals medias e medis che n'han betg la permissiun da manar in'apoteca privata vegnan autorisads da consegnar medicaments circumscrits uschia che la controlla da l'autorisaziun limitada per consegnar medicaments possia vegnir fatga cun custs administrativs giustificabels. Plinavant vegn introducida in'obligaziun d'accoglientscha er per ils ospitals privats e per las clinicas privatas che s'obligheschan - sco ils ospitals publics - d'acceptar persunas malsaunas e disgraziadas. En il senn d'in tractament egual cun ils ospitals privats e cun las clinicas privatas vegnan la finala suttamess er ils ospitals publics ad in'obligaziun da dumandar ina permissiun a la polizia da sanadad.

Chanzlia chantunala dal Grischun

Gremi: regenza
Funtauna: rg chanzlia chantunala dal Grischun