La plazza da pastget artifizial previsa per la plazza da sport Vial
a Domat sco er il bogn dals stabiliments da sport Obere Au a Cuira ha il
departament d'economia publica e fatgs socials integrà en il catalog dal
concept per implants da sport d'impurtanza chantunala (CISIC).
L'onn 2006 ha la regenza grischuna approvà il CISIC. La finamira
principala dal CISIC è da promover en il chantun Grischun ina
infrastructura da sport ch'è confurma al basegn e da resguardar ils
giavischs da la promoziun da sport sco er dal svilup economic. Il
concept è ussa en la fasa da realisaziun.
En ina emprima fasa ha la giunta dal CISIC che consista da
collavuraturas e da collavuraturs dal departament d'economia publica e
fatgs socials, da l'uffizi per la scola populara ed il sport sco er da
l'uffizi per economia e turissem envidà las federaziuns grischunas da
sport a hearings. Gia l'onn passà è vegnì declerà l'implant d'atletica
leva dal stabiliment da sport Ried a Landquart sco implant dal CISIC ed
è vegnì sustegnì cun contribuziuns, l'avrigl 2007 ha il departament
d'economia publica e fatgs socials integrà dus ulteriurs implants en il
catalog dal CISIC.
Plazza da sport Vial a Domat, plazza da pastget artifizial
La plazza da pastget artifizial da la plazza da sport Vial a Domat è
vegnida integrada en il catalog dal CISIC sin proposta da la federaziun
grischuna da ballape. En il Grischun sa tracti qua da l'emprima plazza
da ballape da pastget artifizial che po vegnir duvrada l'entir onn.
Sch'il chantun paja ina contribuziun per construir la plazza da pastget
artifizial, decida la regenza suenter ch'in attest da finanziaziun è
avant maun.
Stabiliment da sport Obere Au a Cuira, bogn
Il bogn dal stabiliment da sport Obere Au a Cuira e vegnì integrà en
il catalog dal CISIC sin proposta da la federaziun grischuna da nudar.
Tenor la federaziun grischuna da nudar è quest bogn che cuntegna in bogn
cuvert (batschigl da 25 meters) ed in bogn avert (batschigl da 50
meters) il bogn il pli impurtant dal Grischun per il sport da massa e da
prestaziun. Sch'il chantun paja ina contribuziun vi dal tetg previs per
il batschigl exteriur, ch'è destinà per la gestiun d'enviern, decida la
regenza suenter ch'in attest da finanziaziun è avant maun.
Ulteriuras integraziuns en il catalog dal CISIC (center da curling a
Tavau u a Flem, implant da biatlon a Lai, center da trenament en las
autezzas en Engiadina a San Murezzan e.u.v.) vegnan examinadas
actualmain da la giunta dal CISIC. Ulteriuras infurmaziuns davart il
CISIC chattais Vus sut www.awt.gr.ch.
Gremi: uffizi per economia e turissem
Funtauna: rg uffizi per economia e turissem