En connex cun la taxaziun da conjugals sustegna la regenza grischuna
da princip la tscherna d'in sistem da la confederaziun, numnadamain il
model dal splitting cumplain, recumonda però l'introducziun dal
splitting parzial, perquai che quel è il pli frequent en ils chantuns.
La taxaziun adequata da las differentas categorias da pajataglias è gia
dapi blers onns in problem permanent per la confederaziun. Sin fundament
da las differentas pretensiuns politicas ha il cussegl federal decidì da
preschentar quatter differents models e da trametter quels en
consultaziun. En quest connex sa tracti d'ina taxaziun individuala
modifitgada, d'in splitting cumplain, d'in dretg d'eleger tranter il
splitting parzial e la taxaziun individuala sco er d'ina nova tariffa
dubla.
Tenor la regenza na cuntentan nagins dals models proponids dal
tuttafatg. Cun il splitting cumplain vegnan cuntanschidas il pli tgunsch
grevezzas equilibradas ed ina taxaziun effizienta. La regenza sustegna
perquai da princip quest model, recumonda però l'introducziun dal
splitting parzial, perquai che quel è il pli frequent en ils chantuns.
Tar il splitting cumplain vegnan - per fixar la tariffa - divididas las
entradas communablas dals conjugals tras dus, e la taglia vegn mintgamai
imponida per la tariffa da la mesadad da las entradas. Tar in splitting
parzial è il divisur pli pitschen che dus. Cun il splitting vegn
resguardà che duas persunas ston viver da las entradas dals conjugals e
che l'adiziun dals facturs da l'um e da la dunna chaschunass senza
questa correctura in progressiun pli auta. En sia consultaziun giavischa
la regenza plinavant ch'i vegnian fatgas - en connex cun l'ulteriura
elavuraziun dal tema - ponderaziuns er areguard las deducziuns ch'èn
relevantas per uffants. Tar quellas tutgan l'autezza da las deducziuns
per uffants sco er l'introducziun d'ina deducziun generala per la tgira
d'uffants ordaifer la famiglia.
Refusada vegn la taxaziun individuala modifitgada, perquai che
quella na schlia nagins problems e chaschuna bler dapli lavur
administrativa ch'il splitting parzial. Ina taxaziun individuala
effectuass ultra da quai differenzas massivas da la grevezza fiscala
tranter conjugals cun in'activitad da gudogn simpla e tals cun
in'activitad da gudogn dubla. Er il model d'eleger na persvada betg dal
puntg da vista dal dretg fiscal ed effectuass propi in stadi d'urgenza
per l'execuziun en ils chantuns. A la fin n'è la regenza dentant er betg
per cuntinuar cun la tariffa dubla che vegn pratitgada ozendi, perquai
che er cun quest model na sa laschan las mancanzas gravantas dal dretg
actual strusch eliminar e perquai che la grevezza supplementara massiva
per persunas che vivan sulettas e che gudognan bain sto vegnir refusada.
La lescha d'energia revedida entra en vigur il 1. da fanadur 2007
La revisiun parziala da la lescha d'energia dal chantun Grischun
entra en vigur il 1. da fanadur 2007. Il medem mument entra en vigur la
revisiun parziala da l'ordinaziun d'energia. Quai ha concludì la regenza
grischuna suenter ch'il termin da referendum è scadì ils 14 da mars
2007, senza ch'el saja vegnì duvrà.
En la sessiun da december 2006 ha il cussegl grond approvà la
revisiun parziala da la lescha d'energia e da l'ordinaziun d'energia. La
revisiun parziala ha l'intent da promover en l'avegnir pli fitg las
energias regenerablas en il Grischun. Ils programs da promoziun èn
vegnids extendids per implants solars, per stgaudiments da laina e per
pumpas da chalur.
La revisiun parziala da la lescha introductiva tar il cudesch civil
svizzer entra en vigur il 1. da fanadur 2007
La regenza grischuna ha mess en vigur la revisiun parziala da la
lescha introductiva tar il cudesch civil svizzer per il 1. da fanadur
2007. Il termin da referendum è scadì, senza ch'el saja vegnì duvrà.
En la sessiun d'avust 2006 ha il cussegl grond approvà la cunvegna
interchantunala davart la surveglianza da la LPP e da las fundaziuns da
la Svizra orientala. Uschia dat el il consentiment a la participaziun
dal chantun Grischun a quest concordat. Il concordat ha la finamira
d'exequir communablamain ed uschia er pli professiunalmain la
surveglianza dals indrizs per la prevenziun professiunala da la Svizra
orientala - quai che daventa adina pli pretensius - e sch'i fa basegn er
la surveglianza da las fundaziuns classicas. En quest connex èsi stà
necessari ch'il cussegl grond approveschia il medem mument la revisiun
parziala da la lescha introductiva tar il cudesch civil svizzer. La
surveglianza da la LPP e da las fundaziuns da la Svizra orientala vegn a
cumenzar cun sia activitad operativa il 1. da schaner 2008.
Stgaffì in nov uffizi d'energia e da traffic
Ils secturs d'energia e da traffic en il departament da
construcziun, traffic e selvicultura dal chantun Grischun vegnan unids.
Or da l'uffizi d'energia ed or dal servetsch per il traffic public vegn
stgaffì a partir dal 1. da schaner 2008 in nov uffizi, l'uffizi
d'energia e da traffic (UETr). Quai ha decidì la regenza grischuna ed ha
approvà la revisiun parziala correspundenta da l'ordinaziun davart
l'organisaziun da la regenza e da l'administraziun.
Tenor la persvasiun da la regenza vegn uschia accentuada
l'impurtanza dals temas centrals energia e traffic sco incumbensas da
provediment en il rom da la politica da l'economia e da l'ambient
actuala dal chantun. Il sectur da traffic duai - ultra da garantir ina
mobilitad persistenta en il chantun - persequitar er la finamira
d'utilisar l'energia en moda spargnusa ed effizienta. Cun la nova
structura d'organisaziun vegn plinavant stgaffì in center uffizial per
dumondas da traffic e d'energia. Ultra da quai han las midadas la
pussaivladad e l'intenziun da simplifitgar las structuras actualas da
direcziun e d'organisaziun sin il stgalim dal departament.
La regenza prenda enconuschientscha da las petiziuns da la sessiun
dals giuvenils.
La regenza grischuna ha prendì enconuschientscha da las petiziuns da
la sessiun dals giuvenils e procura ch'ellas vegnian surdadas al cussegl
grond. La regenza è cuntenta da l'engaschament dals giuvenils che
s'interessan e che lavuran per la politica.
En tut han las participantas ed ils participants da la sessiun dals
giuvenils, che ha gì lieu la fin d'emna dals 12 e dals 13 da matg 2007
en l'edifizi dal cussegl grond, deliberà tschintg petiziuns. Las
petiziuns "giuventetgna en la politica", "Grischun - lieu da furmaziun",
"Grischun - lieu da lavur", "service public" sco er " Grischun -
turissem ed ambient" èn vegnidas acceptadas en las votaziuns finalas.
Da vischnancas e da regiuns
- Wiesen e Tavau: A la fusiun da las vischnancas da Wiesen e da
Tavau vegn garantida ina contribuziun da promoziun da 3'300'000 francs
or dal fond da gulivaziun da finanzas. La garanzia vala cun la resalva
che las vischnancas e ch'il cussegl grond concludian definitivamain la
fusiun fin il pli tard la fin da l'onn 2008.
- Lostallo, Mesauc, Rossa, San Vittore, Soazza e Sta. Maria i.C.: Il
project "bacini antincendio Moesano" (batschigls cunter incendis en il
Moesano) da las vischnancas da Lostallo, da Mesauc, da Rossa, da San
Vittore, da Soazza e da Sta. Maria i.C. ch'èn pertutgadas directamain
dal project da construcziun, vegn approvà. Il project prevesa da
construir en otg lieus batschigls permanents per l'aua da stizzar, e
quai en la furma da puzs artifizials u da batschigls da betun. Als custs
cun dretg da subvenziun vegn garantida ina contribuziun chantunala da
maximalmain 180'000 francs.
- Tinizong-Rona: Il project "lavuratori forestal / magasin da
stalizzas Tinizong" da la vischnanca da Tinizong-Rona vegn approvà. Als
custs cun dretg da subvenziun vegn garantida ina contribuziun chantunala
da maximalmain 132'050 francs.
- Saas en il Partenz: Per reparar la via da guaud da Fädrifa sin il
territori da la vischnanca da Saas en il Partenz, e quai sur ina
lunghezza totala dad 1,28 kilometers, vegn pajada ina contribuziun
chantunala maximala da 30'600 francs.
- Regiun Val Puschlav: Ils statuts da la regiun Val Puschlav (RVP)
vegnan approvads. Ils statuts entran en vigur il 1. da fanadur 2007 e la
corporaziun regiunala survegn la persunalitad giuridica.
- Susch: La revisiun parziala da la constituziun communala da la
vischnanca da Susch, concludida a chaschun da la radunanza communala
dals 10 da mars 2007, vegn approvada.
- Tenna: Il plan da zonas 1:2'000 "Usserbärg" da la vischnanca da
Tenna dals 15 da mars 2007 vegn approvà.
Gremi: regenza
Funtauna: rg chanzlia chantunala dal Grischun