Sut il presidi dal deputà Bruno W. Claus ha la cumissiun dal cussegl
grond per furmaziun e cultura (CFC) predeliberà per mauns dal cussegl
grond la missiva da la regenza tar la participaziun dal chantun per
sanar las finanzas da la "HTM immobiglias SA". A las sesidas da la
cumissiun è sa participà er il cusseglier guvernativ Claudio Lardi.
La "HTM immobiglias SA" è la proprietaria da la chasa da scola
d'hotellaria a Passugg che ha in tract d'internat ed in tract da scola.
En questa chasa da scola d'hotellaria maina la scola svizra per turissem
e per hotellaria SA (SSTH SA) la scola professiunala d'hotellaria dal
Grischun, la scola da commerzi e da turissem, la scola professiunala
d'hotellaria e da turissem, la swiss school of tourism and hospitality,
la scola da cader dal Grischun sco er l'hotel da scola Passugg cun
internat.
Pervia da la grevezza considerabla cun chapital ester e pervia dal
basegn pli e pli grond da mantegnair l'immobiglia da l'onn 1883 na po la
"HTM immobiglias SA" betg pli cumpensar ses custs cun il tschains da
locaziun da la SSTH SA. Il concept da sanaziun ch'è vegnì elavurà pervia
da quai da la "HTM immobiglias SA" prevesa da reducir il chapital ester
tras quai che las donaturas e ch'ils donaturs dals emprests da daners
renunzian a lur pretensiuns, e quai uschè fitg ch'ils custs annuals da
reparatura e da mantegniment pon vegnir finanziads a lunga vista grazia
als respargns da tschains e d'amortisaziun che resultan da quellas
renunzias. En il senn d'ina simmetria da las concessiuns duain las
donaturas ed ils donaturs dals emprests da daners sco er il chantun sa
participar vi da la sanaziun mintgamai cun circa la medema summa.
La tractativa da questa fatschenta en il cussegl grond ch'è stada
previsa oriundamain per la sessiun d'avrigl 2007 è vegnida spustada -
suenter ina discussiun detagliada en la cumissiun il mars 2007 - ad ina
sessiun pli tard per pudair sclerir dumondas avertas per mauns dal
cussegl grond. En quest connex ha la cumissiun pretendì ch'il concept da
sanaziun vegnia giuditgà d'in post extern e ch'i vegnian preschentads
contracts preliminars che garanteschan che la scola vegnia manada
vinavant al lieu da scola da Passugg.
Suenter avair prendì enconuschientscha e suenter avair tractà ils
documents pretendids ch'èn ussa avant maun suonda la cumissiun las
propostas da la missiva da la regenza e s'exprima unanimamain a favur
d'ina participaziun chantunala per sanar las finanzas da la "HTM
immobiglias SA" cun ina summa da maximalmain 4 milliuns francs. En quest
connex renviescha la cumissiun spezialmain a la gronda impurtanza che
las purschidas da scolaziun e da furmaziun supplementara da la SSTH SA
han per il Grischun sco chantun turistic.
Questa fatschenta vegn tractada dal cussegl grond en la sessiun da
zercladur 2007.
Gremi: cumissiun per furmaziun e cultura
Funtauna: rg cumissiun per furmaziun e cultura