La regenza grischuna sustegna da princip il sboz per ina lescha federala davart ils museums e davart las collecziuns da la confederaziun. Beneventà vegn che la lescha obliga tut ils museums e tut las collecziuns da la confederaziun d'avair ina finamira communabla e vul conceder a questas instituziuns ina incumbensa principala unitara. Ultra da quai vegn creada cun questa lescha la basa legala per in museum naziunal svizzer.
La lescha fixescha che la collavuraziun en il sectur dals museums svizzers vegnia meglierada e che la confederaziun duai sustegnair er auters museums ed autras collecziuns en Svizra. Sco quai che la regenza explitgescha en sia consultaziun dubita ella dentant, che la lescha possia contribuir insatge en quest reguard. La regenza è da l'avis ch'ina tala lescha federala fiss bain zunt impurtanta e pudess contribuir essenzialmain per sclerir la situaziun. La lescha stuess però vegnir accordada cun la lescha per promover la cultura ch'è bler pli impurtanta per la cultura en general sco er per ils chantuns.

La lescha davart ils uffants confidads entra en vigur il 1. da fanadur 2007
Il 1. da fanadur 2007 metta la regenza grischuna en vigur la lescha davart ils uffants confidads. Il termin dal referendum facultativ è scadì ils 23 da matg 2007 senza ch'i saja vegnì fatg in tal. La nova lescha davart ils uffants confidads remplazza l'ordinaziun davart la surveglianza dals uffants confidads existenta. Quella vegn pervia da quai abolida il 1. da fanadur 2007.
Il cussegl grond aveva tractà la lescha davart ils uffants confidads en sia sessiun da favrer 2007 e l'aveva acceptada cun 102 cunter 0 vuschs. La lescha ha l'intent da rinforzar la protecziun d'uffants confidads. Questa lescha regla da nov las cundiziuns generalas per la recepziun d'uffants confidads e suttametta l'intermediaziun d'uffants e da plazzas da tgira a l'obligaziun da dumandar ina permissiun.

Contribuziuns or da la fundaziun da dr. Stephan à Porta
Or dal retgav net da l'onn da gestiun 2006 da la fundaziun dr. Stephan à Porta duai - tenor la proposta da la regenza grischuna - vegnir repartida ina contribuziun da totalmain 280'000 francs a las suandantas instituziuns caritativas d'utilitad publica dal Grischun: associaziun alzheimer dal Grischun, Cuira, Appoggio familiare Valposchiavo, Brusio, Benevol dal Grischun, crusch cotschna dal Grischun, Cuira, uniun grischuna d'agid a persunas cun malsognas psichicas, Cuira, federaziun da tetg per la lavur da giuvenils dal Grischun, Cuira, servetsch da pedagogia curativa dal Grischun, Cuira, chasa d'uffants St. Josef, Cuira, canorta d'uffants da di, "Gädemji", Claustra, pro senectute dal Grischun, Cuira, fundaziun "Gott hilft", Zizers, il maun offert, tel. 143 San Galla, federaziun grischuna per la tgira d'uffants cumplementara a la famiglia, Cuira, uniun "team per l'agid a sasez en il Grischun", Cuira.

Da vischnancas e da regiuns
- Sarn, Tartar: A las vischnancas da Sarn e da Tartar vegn garantida ina contribuziun pauschala da 619'080 francs als custs cun dretg da contribuziun per renovar il provediment d'aua.
- Farera: La revisiun parziala da la planisaziun locala da la vischnanca da Farera, concludida ils 8 da december 2006, vegn approvada cun far tschertas prescripziuns per la realisaziun.
- Sumvitg - Trun: Il plan dal cunfin tranter las vischnancas da Sumvitg e da Trun vegn approvà.
- Maraton d'inline da l'Engiadina: A las organisaturas ed als organisaturs dal maraton d'inline da l'Engiadina vegn concedida la permissiun d'utilisar ils 30 da zercladur 2007 il percurs previs en Engiadina.

Contribuziuns chantunalas a differentas instituziuns
- Sportkids BCG: Il program da trenament dals sportkids BCG per l'onn 2007/2008 survegn ina contribuziun da promoziun da maximalmain 150'000 francs.

Projects da vias
La regenza ha approvà totalmain 660'000 francs per construir e per sanar il suandant traject da via:
- via naziunala A13: installaziuns electricas provisoricas per il traject da mantegniment tar il guaud da Casanna

Gremi: regenza
Funtauna: rg chanzlia chantunala dal Grischun