Cuntegn da la pagina

La cumissiun predeliberanta dal cussegl grond beneventa la fusiun da las vischnancas da Veulden, da Sched, da Tràn e da Tumegl a la vischnanca da Tumegl

  • Erste Mitteilung
  • Neuen Beitrag einfügen
Suenter lavurs preliminaras intensivas che las autoritads da las vischnancas pertutgadas han prestà durant divers onns han las votantas ed ils votants da tut las quatter vischnancas da Veulden, da Sched, da Tràn e da Tumegl acceptà ils 13 da december 2007 cun gronda maioritad en tut las vischnancas la cunvegna da fusiun a la nova vischnanca da Tumegl.
Il conclus definitiv davart la fusiun da questas vischnancas è chaussa dal cussegl grond. La cumissiun ch'è vegnida installada dal cussegl grond per preparar questa fatschenta e che vegn presidiada da Jann Hartmann ha predeliberà la missiva correspundenta da la regenza en ina sesida a Tràn. A questa sesida èn stads preschents er il cusseglier guvernativ Martin Schmid sco er las presidentas communalas ed ils presidents communals da las quatter vischnancas.
Suenter ina discussiun intensiva ha concludì la cumissiun unanimamain da suandar la proposta da la regenza e da recumandar al cussegl grond da metter en vigur la fusiun da las vischnancas per il 1. da schaner 2009. Il cussegl grond vegn a tractar quest project durant la sessiun d'avust 2008.

Persuna che dat infurmaziuns:
Jann Hartmann, president da la cumissiun, tel. 079 279 42 39

Gremi: cumissiun predeliberanta per la fusiun a la vischnanca da Tumegl
Funtauna: rg cumissiun predeliberanta per la fusiun a la vischnanca da Tumegl
Neuer Artikel