Cuntegn da la pagina

Ina delegaziun da la cumissiun per sanadad e fatgs socials ha visità il center d'expulsiun Flüeli a Valzeina

  • Erste Mitteilung
  • Neuen Beitrag einfügen
Ina delegaziun da la cumissiun dal cussegl grond per sanadad e fatgs socials ha visità ils 22 da matg 2008 il center d'expulsiun Flüeli a Valzeina. Il motiv per questa inspecziun al lieu è stada la discussiun publica ch'era vegnida manada davart las cundiziuns da collocaziun per las persunas pertutgadas en il center d'expulsiun.
A chaschun da l'inspecziun al lieu - a la quala er represchentantas e represchentants da l'uffizi cumpetent, vul dir da l'uffizi da fatgs da polizia e da dretg civil, sco er il president communal da Valzeina, Hans Wieland, èn stads preschents - ha la delegaziun d'ina vart pudì prender enconuschientscha dal concept da collocaziun ch'è en vigur en il chantun. Da l'autra vart ha ella pudì sa far in agen maletg da las relaziuns d'abitar en il Flüeli, las qualas tschertas gruppaziuns avevan crititgà. In'attenziun speziala ha la cumissiun drizzà en quest connex sin l'eventual provediment medicinal da las abitantas e dals abitants dal center d'expulsiun.
En il rom da sia inspecziun al lieu ha la delegaziun pudì sa persvader che las relaziuns d'abitar e d'alimentaziun en il Flüeli na chaschunan nagins motivs per reclamaziuns. Plinavant ha la delegaziun pudì constatar ch'er il provediment medicinal da las abitantas e dals abitants dal center d'expulsiun è garantì tras las medias e tras ils medis da la val. Tut en tut vegn la delegaziun a la conclusiun che la collocaziun en il center d'expulsiun Flüeli a Valzeina possia senza auter vegnir designada sco acceptabla per las persunas pertutgadas, las qualas pon dal rest partir da tut temp voluntarmain da la Svizra.
La cumissiun cumpletta per sanadad e fatgs socials ha prendì enconuschientscha dal rapport da la delegaziun ed ha approvà tal a chaschun da sia sesida dals 4 da fanadur 2008.

Nov president per la cumissiun per sanadad e fatgs socials
L'onn 2006 era il deputà Vincent Augustin (PCD) vegnì elegì sco president da la cumissiun dal cussegl grond per sanadad e fatgs socials. Tenor l'artitgel 18 da la lescha davart il cussegl grond importa la perioda d'uffizi da las presidentas e dals presidents da las cumissiuns maximalmain dus onns. Pia hai stuì vegnir chattà in successur per Vincent Augustin. En sia sesida dals 4 da fanadur 2008 ha la cumissiun perquai elegì unanimamain il commember da la cumissiun Carlo Portner (PCD) sco ses nov president.

Persuna che dat infurmaziuns:
Vincent Augustin, cumissiun per sanadad e fatgs socials, tel. 081 258 55 25

Gremi: cumissiun per sanadad e fatgs socials
Funtauna: rg cumissiun per sanadad e fatgs socials
Neuer Artikel