Las premissas per conceder ina permissiun da manaschi per chasas da persunas attempadas e da tgira, per gruppas da tgira sco er per ils servetschs da la tgira e da l'assistenza a chasa duain vegnir concretisadas en l'ordinaziun tar la lescha da sanadad. La regenza grischuna ha deliberà per la consultaziun la revisiun correspundenta da l'ordinaziun tar la lescha da sanadad.
Ils 13 da zercladur 2007 aveva il cussegl grond concludì ina revisiun parziala da la lescha per promover la tgira da persunas malsaunas e l'assistenza da persunas attempadas e da persunas che basegnan tgira. Cun la revisiun parziala da la lescha per promover la tgira da persunas malsaunas ch'è vegnida messa en vigur il 1. da schaner 2008 è vegnida introducida tranter auter ina finanziaziun che dependan da la prestaziun dals servetschs da la spitex sco er da la cussegliaziun per mammas e per babs. Ultra da quai èn er vegnidas regladas da nov las contribuziuns d'investiziun ch'il chantun paja a chasas da persunas attempadas e da tgira sco er a gruppas da tgira. Als servetschs da la tgira e da l'assistenza a chasa sco er als servetschs da la cussegliaziun per mammas e per bab pon la finala vegnir scursanidas dapi il 1. da schaner 2008 las contribuziuns dal chantun, sche las prestaziuns na vegnan betg furnidas tenor las pretensiuns che la regenza ha fixà per la qualitad.
Questas novaziuns premettan ussa che las premissas per la permissiun per questas instituziuns vegnian concretisadas en l'ordinaziun tar la lescha da sanadad. En quest connex vegnan fixadas las pretensiuns e las directivas per las chasas da persunas attempadas e da tgira, per las gruppas da tgira e per las abitaziuns da tgira sco er per ils servetschs da la spitex che questas instituziuns ston ademplir per ch'ellas hajan il dretg da survegnir la permissiun da manaschi. Latiers tutgan per exempel tschertas pretensiuns professiunalas minimalas per il persunal da tgira e d'assistenza. Cun quellas duai vegnir garantì che las lavurs da tgira vegnian fatgas mo dal persunal spezialisà ch'è scolà correspundentamain. Da nov ston chasas da persunas attempadas e da tgira sco er gruppas da tgira avair ultra da quai in concept da gestiun sco er in concept da tgira e d'assistenza per persunas cun demenza. Per questas instituziuns èn plinavant vegnidas fixadas las prescripziuns da qualitad, da las qualas l'adempliment sto vegnir cumprovà tras in manaschament da la qualitad certifitgà.
Sco ulteriura novaziun vegn la lavur dad osteopata u dad osteopat sco professiun independenta dal sectur da sanadad renconuschida en l'ordinaziun tar la lescha da sanadad tar las permissiuns per pratitgar la professiun e suttamessa a l'obligaziun chantunala da dumandar ina permissiun. Ina permissiun correspundenta vegn concedida, sche la candidata u sch'il candidat posseda il diplom interchantunal respectiv.
Ils documents da la consultaziun davart la revisiun da l'ordinaziun tar la lescha da sanadad pon vegnir chargiads giu da la pagina d'internet dal departament da giustia, segirezza e sanadad www.djsg.gr.ch. La consultaziun dura fin ils 15 d'october 2008.

Gremi: regenza
Funtauna: rg chanzlia chantunala dal Grischun