Cuntegn da la pagina

La cumissiun predeliberanta dal cussegl grond beneventa la fusiun en la Val Müstair

  • Erste Mitteilung
  • Neuen Beitrag einfügen
En la sessiun d'avust vegn la regenza a suttametter al cussegl grond la missiva davart la fusiun da las vischnancas da Fuldera, da Lü, da Müstair, da Sta. Maria V.M., da Tschierv e da Valchava a la vischnanca da Val Müstair. Il conclus definitiv davart questa fusiun è chaussa dal cussegl grond. La cumissiun ch'è vegnida installada dal cussegl grond per predeliberar questa fatschenta e che vegn presidiada da la deputada Margrit Darms-Landolt ha discutà la missiva da la regenza a chaschun d'ina sesida a Sta. Maria V.M. en preschientscha da represchentantas e da represchentants da las autoritads da las vischnancas pertutgadas e dal cusseglier guvernativ Martin Schmid.

Sut la responsabladad da la corporaziun regiunala Val Müstair è il project "Avegnir Val Müstair" vegnì lantschà ils 11 d'avust 2006. Las gruppas da project ch'èn alura vegnidas installadas han elavurà la basa ed han formulà differentas vias per realisar ina fusiun da questas vischnancas. La populaziun, las autoritads sco er las collavuraturas ed ils collavuraturs da questas vischnancas èn vegnids infurmads regularmain davart il stadi da las lavurs da project ed envidads da sa participar activamain al process da refurma. L'avrigl 2008 - pia main che dus onns suenter il cumenzament dal project - han las sis vischnancas gia acceptà cun gronda maioritad la cunvegna da fusiun. La vischnanca da Lü ha fatg quai suenter ina refusa da la cunvegna da fusiun pir en ina segunda votaziun.

La cumissiun beneventa la fusiun da las sis vischnancas ad ina vischnanca da vallada ed ha pervia da quai - suenter ina discussiun intensiva - er concludì unanimamain da suandar la proposta da la regenza e da recumandar al cussegl grond da metter en vigur la fusiun da las vischnancas per il 1. da schaner 2009.

Gremi: cumissiun predeliberanta per la fusiun a la vischnanca da Val Müstair
Funtauna: rg cumissiun predeliberanta per la fusiun a la vischnanca da Val Müstair
Neuer Artikel