En la sessiun d'avust 2008 suttametta la regenza al cussegl grond pliras missivas per fusiuns da vischnancas, uschia er per la fusiun da la vischnanca da Tavau cun la vischnanca da Wiesen. Il conclus definitiv davart la fusiun da questas duas vischnancas è chaussa dal cussegl grond. La cumissiun predeliberanta ch'è vegnida nominada dal cussegl grond per quest intent e che stat sut il presidi da Jann Hartmann ha discutà la missiva respectiva da la regenza en preschientscha da cusseglier guvernativ Martin Schmid sco er en preschientscha da represchentantas e da represchentants da las autoritads da las vischnancas pertutgadas.

Las experientschas che la suprastanza communala da Wiesen ha fatg ils ultims onns, numnadamain che l'independenza d'ina vischnanca pitschna vegnia sutminada pli e pli, ha provocà Wiesen da tschertgar pussaivladads per collavurar en moda pli intensiva cun la vischnanca vischina da Tavau. Il resultat da las stentas d'ina gruppa da lavur ch'è sa cumponida da represchentantas e da represchentants dad omaduas vischnancas è stada la cunvegna da fusiun ch'è la finala vegnida acceptada cun gronda maioritad dad omaduas vischnancas.
Tras l'incorporaziun daventa Wiesen la sisavla fracziun da la vischnanca da Tavau e survegn uschia il medem status sco las fracziuns gia existentas da Tavau Vitg, da Tavau Plaz, da Frauenkirch, da Glaris e da Monstein. Cun 284 kilometers quadrat daventa la nova vischnanca la vischnanca la pli gronda da la Svizra.

Suenter ina discussiun intensiva ha la cumissiun predeliberanta concludì unanimamain da suandar la proposta da la regenza e da recumandar al cussegl grond da metter en vigur la fusiun da las vischnancas per il 1. da schaner 2009.

Gremi: cumissiun predeliberanta per la fusiun da la vischnanca da Tavau
Funtauna: rg cumissiun predeliberanta per la fusiun da la vischnanca da Tavau