La fundaziun grischuna per innovaziun, svilup e perscrutaziun, ch'è vegnida fundada il december 2007, ha cumenzà sias activitads il schaner 2008. A partir d'ussa pon vegnir inoltradas dumondas per projects. La fundaziun è dotada cun 30 milliuns francs or dals retgavs extraordinaris da la banca chantunala grischuna. Sia finamira è quella da rinforzar e da sviluppar vinavant il Grischun sco lieu economic, sco lieu da scolaziun e sco lieu da perscrutaziun, e quai ensemen cun interpresas da l'economia e cun autras instituziuns.

Ils 17 da december è la fundaziun grischuna per innovaziun, svilup e perscrutaziun vegnida fundada formalmain. Sco represchentant per la regenza grischuna è stà preschent cusseglier guvernativ Hansjörg Trachsel, schef dal departament d'economia publica e fatgs socials. Il cumenzament da schaner 2008 ha la fundaziun gì sia emprima sesida ed ha prendì per mauns sias activitads. Ils proxims mais vegn la fundaziun a concepir las infurmaziuns da basa necessarias. Dumondas per projects pon vegnir inoltradas immediatamain.
Commembras e commembers dal cussegl da fundaziun da la fundaziun grischuna per innovaziun, svilup e perscrutaziun èn prof. dr. Roman Boutellier, 9413 Oberegg, Bettina Plattner-Gerber, 7504 Puntraschigna, prof. dr. Peter Rieder, 8606 Greifensee, dr. Johannes Randegger, 4126 Bettingen, Christina Davatz-Höchner, 3254 Messen sco er dr. Ruedi Minsch, Tumein. President dal cussegl da fundaziun è prof. Boutellier. El è professer per tecnologia ed innovaziun al departement of management, technology and economics da la scola politecnica federala (SPF) da Turitg.

Intent da la fundaziun
En collavuraziun cun instituziuns ed interpresas ha la fundaziun l'intent da rinforzar il Grischun sco plazza economica e da sustegnair projects che portan al chantun Grischun ina valur agiuntada, know-how e plazzas da lavur, e quai oravant tut cun resursas indigenas.
Tenor il document da fundaziun cuntanscha la fundaziun quest intent oravant tut cun conceder contribuziuns finanzialas ed emprests da daners per projects excellents e spezials cun valur agiuntada, cun forza innovativa e cun persistenza per il chantun Grischun. La finamira è tranter auter da sviluppar prestaziuns da servetsch e products novs ed innovativs che pon concurrer sin il martgà naziunal ed internaziunal, d'exaurir, d'intensivar e da trair a niz las resursas indigenas ed il potenzial indigen sco er da sustegnair la collavuraziun e l'entretschament da las instituziuns da furmaziun e da perscrutaziun cun las interpresas da l'economia. Plinavant prevesa la fundaziun da crear e d'amplifitgar transfers da savida e d'elavurar resultats da perscrutaziun sco er da perscrutar il spazi vital e cultural dal Grischun.
Per l'evaluaziun sistematica da potenzials per crear plazzas da lavur e per sviluppar e sustegnair projects innovativs e prestaziuns da servetsch en il chantun Grischun po la fundaziun ultra da quai furmar in institut a la scola auta da tecnica ed economia (SATE) u tar in'autra instituziun en il chantun Grischun.
Ils meds vegnan impundids per interpresas, instituziuns e per persunas singulas che han ina relaziun cun il chantun Grischun.

Stabilir in secretariat
Il secretariat da la fundaziun grischuna per innovaziun, svilup e perscrutaziun è integrà en l'uffizi per economia e turissem. Uschia po tar las dumondas che vegnan inoltradas per projects er vegnir examinada ina eventuala concordanza cun ils meds da promoziun da la lescha per promover l'economia publica u cun ils instruments da promoziun d'autras politicas secturialas.

Dumondas per projects pon vegnir inoltradas:

Fundaziun grischuna per innovaziun, svilup
e perscrutaziun
c/o uffizi per economia e turissem
Eugen Arpagaus
Grabenstrasse 1
7001 Cuira

Per infurmaziuns stat a disposiziun:
- prof. dr. Roman Boutellier, president da la fundaziun, tel. 044 632 05 80
(da cuntanscher da las 13.30 - las 17.00)
- Eugen Arpagaus, secretariat, tel. 081 257 23 77
(da cuntanscher da las 13.30 - las 17.00)

Gremi: Fundaziun grischuna per innovaziun, svilup e perscrutaziun
Funtauna: rg fundaziun grischuna per innovaziun, svilup e perscrutaziun