Il chantun Grischun duai sa participar a la cunvegna interchantunala
davart la medischina fermamain spezialisada (CIMFS). Quai propona la
regenza en la missiva correspundenta ch'ella ha deliberà per mauns dal
cussegl grond. Il parlament vegn a tractar questa fatschenta en la
sessiun d'october.
En il sectur da la medischina fermamain spezialisada duai questa
cunvegna remplazzar la planisaziun vertenta dals singuls chantuns tras
ina planisaziun naziunala. La finamira principala da la cunvegna è
quella d'augmentar la qualitad ed il niz per las pazientas e per ils
pazients sco er da meglierar la rentabilitad en quest sectur. La
cunvegna è vegnida deliberada ils 14 da mars 2008 da la radunanza
plenara da la conferenza svizra da las directuras e dals directurs
chantunals da sanadad. Ella entra en vigur, cur che 17 chantuns,
inclusiv ils chantuns cun ospitals universitars, èn sa participads ad
ella.
La medischina fermamain spezialisada cumpiglia - tenor la cunvegna -
quels secturs e quellas prestaziuns ch'èn caracterisads tras lur
rarezza, tras lur grond potenzial d'investiziun, tras lur grond basegn
da persunal u d'apparats tecnics ubain tras proceduras da tractament
cumplexas. Latiers tutgan tranter auter prestaziuns spezialisadas da la
neurochirurgia, da la chirurgia dal cor u da la transplantaziun da
tscherts organs.
Concretamain vegn in nov organ da decisiun, che vegn nominà dals
chantuns, a decider en l'avegnir davart la concentraziun da questas
prestaziuns en tscherts ospitals da la Svizra. Las prestaziuns
determinadas vegnan inscrittas sin ina glista e dastgan vegnir furnidas
en l'avegnir mo pli en tscherts lieus. Questa glista vegn examinada
periodicamain e vegn adattada, sche quai fa da basegn.
La cunvegna prevesa la pussaivladad d'attribuir prestaziuns da la
medischina fermamain spezialisada er ad ospitals dal center ed uschia
eventualmain er a l'ospital chantunal dal Grischun. Ord vista da la
regenza èn ademplidas las cundiziuns generalas, per ch'il chantun possia
sa participar a la cunvegna interchantunala. Tras las resursas
disponiblas po uschia vegnir garantì - en il sectur da la medischina
fermamain spezialisada - in provediment adequat d'auta qualitad ch'è
uschè favuraivel sco pussaivel.
Gremi: regenza
Funtauna: rg chanzlia chantunala dal Grischun