Cuntegn da la pagina

Approvà il manaschament da privels da la natira 2008

  • Erste Mitteilung
  • Neuen Beitrag einfügen
La regenza grischuna ha approvà il program da lavur "manaschament da privels da la natira 2008" cun expensas totalas dad 1'625'000 francs. Quest program da lavur cuntegna puncts centrals en il sectur dal sistem d'infurmaziun davart privels sco er la cuntinuaziun e la nova redacziun da chartas da privel en diversas vischnancas. Var 60 pertschient da las lavurs vegnan fatgas dal servetsch forestal chantunal. Secturs parzials spezials dal volumen da lavur vegnan surdads a biros privats. Suenter la deducziun da las contribuziuns federalas che pon vegnir spetgadas restan al chantun expensas nettas da var 420'000 francs.

Repartì la dieschma d'alcohol
La regenza grischuna ha repartì la dieschma d'alcohol en l'autezza da 734'715 francs per l'onn da gestiun 2007. Quests daners vegnan duvrads per projects da prevenziun, per custs da tractament sco er per projects da perscrutaziun e da furmaziun. Tenor la lescha federala davart las bavrondas destilladas ston ils chantuns duvrar lur part dal retgav net da l'administraziun federala d'alcohol per cumbatter l'alcoholissem en ses motivs ed en sias consequenzas sco er per cumbatter l'abus da drogas, da narcotics e da medicaments.

Da vischnancas e da regiuns
Farera: Als custs per sanar la via d'alp Calantgil - Starlera sin il territori da la vischnanca da Farera vegn pajada ina contribuziun chantunala da maximalmain 218'458 francs.
Medel/Lucmagn: A la corporaziun d'aua "provediment d'aua Medel/Lucmagn" vegn garantida ina contribuziun da 245'520 francs als custs per engrondir e per renovar il stabiliment dal provediment d'aua.
Susch: La constituziun da la vischnanca da Susch dals 12 da zercladur 2008 vegn approvada cun excepziun da l'art. 68 frasa 2.

Contribuziuns chantunalas a differentas instituziuns
Plazzas da dimora e da lavur protegidas Engiadina e vals dal sid: Il project ch'è vegnì inoltrà da l'uniun per plazzas da dimora e da lavur protegidas Engiadina e vals dal sid per renovar e per adattar il lavuratori da la "ufficina" a Samedan vegn approvà. Als custs vegn garantida ina contribuziun da construcziun da maximalmain 319'040 francs.
Uniun da turissem dal Puschlav: A l'uniun da turissem dal Puschlav vegn garantida ina contribuziun da totalmain 89'310 francs als custs da transfurmaziun per furmar in'organisaziun turistica futura (OTF) per ils onns 2008 e 2009.
Academia da las Alps Grischun dal sid: Al secretariat da la "Academia da las Alps Grischun dal sid" vegn garantida ina contribuziun da totalmain 55'000 francs per ils onns 2008, 2009 e 2010.

Projects da vias
La regenza ha approvà totalmain 1'264'000 francs per construir e per sanar ils suandants trajects da vias:
- via naziunala A28: lavurs d'impressari e da cuvrida, punt dal Sägentobel
- via dal Landwasser: lavurs d'impressari e da cuvrida, sviament da Taferna
Chanzlia chantunala dal Grischun

Gremi: regenza
Funtauna: rg chanzlia chantunala dal Grischun
Neuer Artikel