Grazia a l'immigraziun da persunas da l'exteriur e grazia al lev augment dal dumber da naschientschas è il dumber da la populaziun grischuna s'augmentà per la fin da l'onn 2007 per 0.4%. Entaifer la populaziun residenta estra n'è la gruppa da las persunas ch'èn burgaisas da la Germania betg mo la gruppa ch'è creschida il pli fitg, mabain ussa absolutamain er la gruppa da persunas estras la pli gronda en il Grischun.

Lev augment da la populaziun en il Grischun
La populaziun residenta dal chantun Grischun sa chattava ils 31 da december 2007 cun 188'762 persunas sur il stadi da l'onn precedent 2006 (187'920). La populaziun dal Grischun è creschida uschia mo per 0.4%, entant ch'ella è s'augmentada en tut la Svizra per 1.1%.

Sch'ins considerescha ils ultims diesch onns, è la populaziun dal Grischun creschida en media per 0.2% l'onn (CH: 0.7%). Per questa perioda temporala demussan en tut la Svizra mo sis auters chantuns ina creschientscha pli pitschna.

Entaifer il chantun è il dumber da la populaziun sa sviluppà en moda differenta l'onn 2007. Cun 1.6% è l'Engiadina bassa creschida il pli fitg; ina creschientscha da mintgamai 1.0% permetta mo pli a la Mesolcina ed a la regiun dal Grischun dal nord d'entrar anc en la media svizra. La perdita da populaziun la pli gronda ha evidentamain gì la Val Müstair (-2.5%), diminuziuns pli grondas han medemamain gì la Val Calanca (-1.3%), la regiun dal Grischun central (-0.6%), sco er Tavau e la Bregaglia (mintgamai -0.5%).

Surpli d'immigraziun da l'exteriur e stabilisaziun dal dumber da naschientschas
Il dumber dals mortoris en il chantun (1'685) ha surpassà l'onn 2007 il dumber da las naschientschas (1'599). Il saldo negativ da las naschientschas ha dentant pudì vegnir cumpensà cun in saldo positiv pli grond da l'immigraziun, uschia ch'il dumber total da la populaziun è s'augmentà levamain. Quest surpli d'immigraziun vegn chaschunà tras umans da pajais esters (+1'514). En la cumparegliaziun interchantunala ha il Grischun pers 815 abitantas ed abitants als auters chantuns. Cumpareglià cun l'onn precedent è il dumber da las naschientschas s'augmentà l'onn 2007 en il Grischun sin 1'599 (2006: 1'533). Perquai che questa cifra è anc adina bassa en la cumparegliaziun istorica, n'èsi probablamain betg permess da discurrer qua d'ina midada da la tendenza.

Las persunas ch'èn burgaisas da la Germania èn da nov la gruppa da persunas estras la pli gronda
La quota da la populaziun estra en il chantun Grischun importa 14.8% per la fin da l'onn 2007, entant che la media da la Svizra sa chatta tar 21.1%. En set chantuns da la Svizra sa chatta la quota da la populaziun estra sut il nivel dal Grischun.
Cun 21.7% èn las persunas ch'èn burgaisas da la Germania per l'emprima giada la gruppa la pli gronda da la populaziun estra residenta. Ina quota da la populaziun estra ch'è quasi medem gronda han las persunas ch'èn burgaisas dal Portugal (21.0%), respectivamain da l'Italia (20.0%). Ultra da questas trais gruppas da persunas estras dominantas è s'augmentada l'onn passà - sin in nivel bler pli bass - cunzunt l'immigraziun dals anteriurs stadis da la UE sco da la Frantscha (+ 5.5%), da l'Ollanda (+ 4.4%) ed er da l'Austria (+ 3.3%). Percunter sa reducescha en il chantun Grischun il dumber da la populaziun che deriva dals pajais dal Balcan sco da la Serbia (-3.6%), da la Bosnia-Erzegovina (-6.6%) e da la Macedonia (-2.7%).

Circa trais quarts da la populaziun grischuna viva en vischnancas che han dapli che 1'000 abitantas ed abitants
Cun 22 abitantas ed abitants è Purtagn la vischnanca la pli pitschna dal chantun Grischun. En ulteriuras 28 vischnancas sa chatta il dumber d'abitantas e d'abitants er sut 100 persunas. Questas 29 vischnancas u 14.1% da tut las vischnancas dal Grischun cumpiglian 0.9% da la populaziun grischuna.
104 vischnancas - la mesadad da las vischnancas dal Grischun - han in dumber d'abitantas e d'abitants tranter 100 e 499 persunas. En questas vischnancas vivan 14.2% da la populaziun grischuna.
27 vischnancas appartegnan a la classa da vischnancas cun ina populaziun tranter 500 - 999 persunas. Uschia vivan 19'729 persunas u 10.5% da tut las Grischunas e da tut ils Grischuns en 13.1% da las vischnancas dal Grischun.
La finala datti en il chantun Grischun 46 vischnancas (22.4% da tut las vischnancas) che han ina populaziun cun dapli che 1'000 persunas. Stgars trais quarts da la populaziun dal chantun Grischun è domiciliada en questas vischnancas.

Gremi: uffizi per economia e turissem
Funtauna: rg uffizi per economia e turissem