En ses rapports duai la RTSI resguardar pli fitg la vita politica,
culturala e sociala dal Grischun. Per quai stuessan las occurrenzas ed
ils eveniments da tut il Grischun vegnir tgirads meglier
schurnalisticamain. Quai pretenda la regenza en ina brev a la Societad
cooperativa per la radiotelevisiun da la Svizra taliana (CORSI) ed a la
direcziun da la RTSI.
Il basegn ed il dretg da survegnir infurmaziuns cumplessivas en
talian èn tenor la regenza giustifitgads tant per la populaziun da las
valladas talianas dal Grischun sco er per la populaziun taliana da las
autras parts dal Grischun. Pervia da quai vegn la RTSI supplitgada
d'augmentar ses persunal a Cuira sco gia garantì pli baud. Ultra da quai
duain er vegnir stgaffidas plazzas da correspundentas e da
correspundents en las valladas rumantschas e tudestgas. Mo uschia
possian ils rapports sur dal Grischun esser pli cumplessivs e mo uschia
possia l'identitad da la "Svizzera italiana" vegnir rinforzada. La
regenza punctuescha ch'ils rapports duajan resguardar tut il chantun
Grischun e betg mo las valladas talianas. Per la regenza grischuna n'èsi
betg acceptabel, sche las Grischunas e sch'ils Grischuns da lingua
taliana vegnian discriminads envers las Tessinaisas ed ils Tessinais che
profitan d'ina infurmaziun cumplessiva sur da tut il Tessin.
En la brev exprima la regenza ultra da quai sia malcuntentientscha
envers la RTSI, perquai ch'ella n'ha anc betg ademplì en moda
suffizienta las empermischuns ch'ella ha dà pli baud. Suenter las
intervenziuns da la regenza ils onns 2005 e 2007, ha la RTSI empermess
d'augmentar sias plazzas da correspundentas e da correspundents en il
Grischun. Per la regenza èsi cler che la RTSI sto prender serius ils
basegns legitims dal chantun Grischun e far propostas concretas per
meglierar la situaziun. Uschiglio sa tegna la regenza averta la
pussaivladad d'intervegnir tar las autoritads federalas per survegnir
ina meglra cuvrida tras la televisiun e tras il radio da lingua taliana
resp. d'insister che las disposiziuns da la lescha federala davart radio
e televisiun vegnian ademplidas.
Il servetsch d'infurmaziun da l'instituziun statala da radio e
televisiun RTSI vegn finanzià tras las taxas. Cun circa 280 milliuns
francs per onn vegnan producids trais programs da radio (rete uno, rete
due, rete tre) e dus programs da televisiun (TSI 1 e TSI 2). Dals passa
1000 emploiadas ed emploiads da la RTSI èn staziunads mo trais
schurnalists stablamain en il chantun Grischun.
Gremi: regenza
Funtauna: rg chanzlia chantunala dal Grischun