La regenza grischuna ha approvà il program da vaccinaziun cunter
cancer dal culiez da la madra (vaccinaziun da HPV) en il chantun
Grischun. L'uffizi da sanadad è vegnì incumbensà cun la realisaziun dal
program chantunal da vaccinaziun. Quel prevesa che mattettas e che
dunnas giuvnas en la vegliadetgna dad 11 fin 19 onns pon sa laschar
vaccinar gratuitamain cunter cancer dal culiez da la madra. La
permissiun da vaccinar survegnan medias e medis ch'èn domiciliads en il
chantun e ch'èn s'annunziads en scrit tar l'uffizi da sanadad. La
confederaziun ha designà la vaccinaziun da HPV sco prestaziun che vegn
renconuschida da la cassa da malsauns, sche questa vaccinaziun vegn
fatga en il rom da programs chantunals da vaccinaziun. Il settember
trametta l'uffizi da sanadad a las dunnas giuvnas che duain vegnir
vaccinadas ina brev d'infurmaziun cun ulteriurs detagls.
Mess en vigur la revisiun parziala da la lescha davart las
scolas medias
La revisiun parziala da la lescha davart las scolas medias vegn
messa en vigur retroactivamain per il 1. da settember 2008. Quai ha
concludì la regenza grischuna. A medem temp ha la regenza relaschà
respectivamain adattà differentas autras ordinaziuns.
En la sessiun d'avrigl ha il cussegl grond concludì la revisiun
parziala da la lescha davart las scolas medias. Ina consequenza da quai
è stà tranter auter che la durada da la scolaziun gimnasiala è vegnida
francada da nov en la lescha. Il gimnasi dura sco fin ussa 6 u 4 onns.
Da nov è er la maturitad spezialisada - che po vegnir acquistada a la
scola media professiunala - vegnida francada en la lescha. Il termin da
referendum cunter questa revisiun parziala è scadì ils 31 da fanadur
2008, senza ch'i saja vegnì fatg in referendum.
Per realisar las mesiras ch'èn vegnidas preschentadas al cussegl
grond ha la regenza revedì a medem temp pliras ordinaziuns. Per profilar
il gimnasi inferiur na po tranter auter la 1. classa betg pli vegnir
repetida. Al gimnasi duai plinavant vegnir augmentada la qualitad da
scolaziun, e quai tras examens finals ch'èn coordinads en mintga scola,
ma er tras mesiras che pertutgan l'instrucziun. La procedura d'admissiun
durant il 8. onn da scola vegn applitgada da nov er en la scola media
commerziala ed en la scola media professiunala. La finala ha la regenza
determinà che la maturitad spezialisada en pedagogia vegnia purschida a
Schiers, la maturitad spezialisada en sanadad a Glion e la maturitad
spezialisada en lavur sociala a Cuira.
Da vischnancas e da regiuns
Seewis: Il project cunter crudada da crappa "Steinbrugg" da la
vischnanca da Seewis vegn approvà e sustegnì cun ina contribuziun da
maximalmain 753'900 francs.
Tujetsch: A la vischnanca da Tujetsch vegn garantida ina
contribuziun da maximalmain 206'990 francs per mesiras da cumplettaziun
e per l'engrondiment da la serenera.
San Vittore: La constituziun da la vischnanca da San Vittore dals 28
d'avrigl 2008 vegn approvada.
Contribuziuns chantunalas a differentas instituziuns
Meds finanzials da la lottaria naziunala: La regenza ha approvà
circa 424'000 francs or dal fond da la lottaria naziunala per intents
culturals. En quest connex vegnan resguardadas tut en tut 69
instituziuns.
Regiun Bregaglia: A la regiun Bregaglia vegn garantida per ils onns
2008 e 2009 ina contribuziun da 250'000 francs als custs da
transfurmaziun per furmar in'organisaziun turistica futura (OTF).
Project "Filmland Südbünden": Il project da perscrutaziun e da dieta
"Filmland Südbünden" vegn sustegnì cun ina contribuziun unica da 7'000
francs.
Club da hockey Partenz-Signuradi: Per cumprar nov material da goli
per la generaziun giuvna survegn il club da hockey Partenz-Signuradi ina
contribuziun da 9'600 francs or dal fond da sport.
Club da hockey da Tavau: Per cumprar nov material da goli per la
generaziun giuvna survegn il club da hockey da Tavau ina contribuziun da
6'300 francs or dal fond da sport.
Cuira unihockey: A Cuira unihockey vegn garantida ina contribuziun
da 5'600 francs or dal fond da sport per cumprar bandas d'unihockey per
la plazza gronda.
Projects da vias
La regenza ha approvà totalmain 175'000 francs per construir e per
sanar il suandant traject da via:
- via naziunala A28: lavurs d'impressari, sviament da Küblis
Chanzlia chantunala dal Grischun
Gremi: regenza
Funtauna: rg chanzlia chantunala dal Grischun