Cuntegn da la pagina

In di da giudair

  • Erste Mitteilung
  • Neuen Beitrag einfügen
Gia per la 15avla giada vegn manà tras il di europeic dal monument en 48 pajais da l'Europa. Per la fin d'emna dals 13 e 14 da settember 2008 envidan la tgira da monuments e 13 "lieus da giudiment" exquisits a questa occurrenza che ha lieu quest onn en tut il chantun Grischun cun visitas guidadas e cun purschidas spezialas dals manaschis gastronomics.

Dapi il 19avel tschientaner èn vegnids construids en il Grischun numerus hotels pumpus pervia dal svilup dals bogns e da l'alpinissem e pervia da las activitads da cura climaticas. Davent dals exempels enconuschents da la "belle epoque" fin a la chasa dals onns 1930, che regorda amuraivlamain a la patria, è il svilup da l'architectura d'hotels perceptibel fin oz. Ma er edifizis ch'èn plirs tschientaners vegls èn vegnids transfurmads pli tard en hotels. Els raquintan als giasts ord l'istorgia dal lieu, uschia che mintga dimora daventa in eveniment singular. Cunquai che la dumonda e la purschida da l'atmosfera unica da tals manaschis gastronomics creschan, reunescha la marca "Swiss Historic Hotels" dapi l'onn 2004 en l'entira Svizra quests hotels renovads.

Da gronda impurtanza per il turissem era ed è il traject Alvra-Bernina da la Viafier retica che ha survegnì dacurt la distincziun sco patrimoni mundial da la UNESCO. Per questa chaschun vegn fatga ina gronda festa, e quai medemamain la fin d'emna dals 12 fin ils 14 da settember.

Infurmaziuns pli detagliadas davart ils programs porschan www.denkmalpflege.gr.ch e www.rhb-unesco.ch.

Lieus da giudiment exquisits

Tavau | Hotel Schatzalp
Premià sco hotel istoric da l'onn 2008 en renconuschientscha da ses edifizi istoric ch'è resta per gronda part tradiziunal, da la buna utilisaziun e dal mobigliar autentic da l'hotel sco er da la restauraziun da l'iert botanic Alpinum Schatzalp.

Cama | Grottos
La «fundaziun per la revitalisaziun dals grottos da Cama» ha cumenzà ils ultims onns a renovar ils passa 40 anteriurs grottos da Cama. Quels èn vegnids construids il 18avel tschientaner en in lieu sur il vitg, nua che la temperatura dals tschalers vegn tegnida constanta tras las funtaunas d'aria frestga.

Cuira | Hotel romantic Stern
L'istorgia da l'hotel Stern va enavos fin l'onn 1677. L'hotel Stern dad oz è in stabiliment dal classicissem tardiv a l'entrada da la citad veglia da Cuira. L'onn 1907 ha Johann Anton Tscharner integrà là ina loscha dals framassuns. Ils architects Schäfer & Risch han creà l'onn 1913 - en stil indigen - l'ustaria bain mantegnida.

Flem Casa d'Uaul | Hotel romantic
Influenzà dal jugendstil è quest hotel vegnì construì l'onn 1903 sco edifizi istoristic cun turettas da chantun e cun ina gronda veranda. Nà da las stgalas centralas cuntanschan ins - traversond la halla magnifica - il parc u las salas da reuniun al plaunterren. Lur mobigliar or dal temp da construcziun è mantegnì per gronda part en il stadi original.

Flem | Park Hotel Waldhaus
L'edifizi principal dal classicissem tardiv è vegnì construì ils onns 1875 fin 1877. Ils onns 1881 e 1889 èn vegnidas vitiers las dependances, la villa Belmont e la villa Silvana. Ina chasa da reuniun cun salas da mangiar, da café e da divertiment è vegnida construida l'onn 1904. Per quest edifizi ha Giovanni Giacometti creà in panorama. Il cumplex cun ses sistem da pavigliun vegn cumplettà tras architectura contemporana.

Claustra | Chesa Grischuna
La Chesa Grischuna è vegnida construida l'onn 1938, avant l'exposiziun naziunala da l'onn 1939 a Turitg, cur ch'ins sa regurdava en Svizra dal stil indigen. La chasa, l'interiur ed il mobigliar pitschen èn vegnids concepids sco ovra cumplessiva da l'enconuschent architect turitgais Hermann Schneider. Las lavurs èn vegnidas exequidas da mastergnants indigens.

Pasqual | Hotel dal chastè da Sins
Il chastè da Sins è vegnì terminà enturn l'onn 1695. El posseda in tetgom ritgamain decorà en il stil svizzer da lain ed ina fatschada artistica da sgrafit che datescha dals onns 1892/93, cur che Nicolaus Hartmann (senior) ha concepì il chastè da nov. In'attracziun èn las chombras, ch'èn vegnidas renovadas en moda miaivla, sco er il iert magnific cun ina part barocca.

Puschlav | Hotel Albrici à la Poste
L'hotel istoric Albrici a Puschlav è vegnì construì l'onn 1682 sco chasa d'abitar burgaisa. La transfurmaziun en l'hotel ha gì lieu l'onn 1848. Remartgabels èn ils locals interns ornads, cunzunt la sala da las sibillas cun il tavlegià pompus, cun il tschiel sura da lain e cun ils 12 maletgs en ieli che dateschan dal 17avel tschientaner e che represchentan figuras da dunnas.

Samedan | Hotel Palazzo Mysanus e Chesa Planta
Il Palazzo Mysanus - ina chasa patriziana - è vegnì construì il 17avel tschientaner e vegn utilisà ussa sco hotel da musica e da cultura.
En la Chesa Planta - ina chasa patriziana dal 16avel tschientaner - sa chattan il museum davart la cultura d'abitar dal 18avel e dal 19avel tschientaner, la biblioteca rumantscha sco er l'archiv da cultura.

Santa Maria Val Müstair | Hotel Chasa de Capol
Anteriura sedia dals conts de Capol, substituts da la regenza e prevosts da la claustra benedictina Son Jon a Müstair. L'onn 1838 è s'extinguida la lingia da la famiglia dals conts de Capol. Suenter che l'edifizi è stà vid durant var 120 onns, porscha el oz - grazia a renovaziuns miaivlas - ospitalitad moderna en ina chasa patriziana.

Segl Maria | Hotel Edelweiss e hotel Waldhaus
L'hotel Edelweiss deriva d'in edifizi dals onns 1875/76. La fatschada sco er la sala da mangiar cuntegnan elements neogotics da gronda impurtanza.
L'hotel Waldhaus è vegnì construì ils onns 1905 fin 1908. Ses intern cun las stgalas imposantas è per gronda part intact. Las salas ed ils saluns impressiunants en il plaunterren èn ina part da l'interiur magnific.

Soglio | Palazzo Salis
Il palazzo Salis è vegnì construì l'onn 1630 tras Baptista da Salis sco simpla chasa d'abitar ed ha survegnì sia cumparsa odierna en il vitg bregagliot da Soglio tras ina gronda midada da construcziun l'onn 1701. Dapi l'onn 1876 vegn il palazzo utilisà sco hotel. In iert pittoresc davos l'edifizi è il spazi exteriur adequat per il palazzo baroc.

Gremi: uffizi da cultura
Funtauna: rg uffizi da cultura
Neuer Artikel