Il chantun Grischun vul stabilir tut en tut tschintg centers, nua ch'i pon vegnir registradas las datas biometricas per ils novs passaports. Quests tschintg centers duain vegnir repartids en moda decentrala en l'entir chantun. Quai ha concludì la regenza grischuna.
La confederaziun planisescha d'introducir per il 1. da mars 2010 en l'entira Svizra datas biometricas en ils differents geners d'attests d'identitad sco passaports, cartas d'identitad e legitimaziuns da persunas estras. Ils chantuns ston planisar l'infrastructura correspundenta per la registraziun da las datas. Er la finanziaziun da quests posts da registraziun è chaussa dals chantuns.
En vista al fatg ch'il chantun è populà en moda decentrala, è la regenza da l'avis ch'i saja raschunaivel e necessari da stabilir tschintg centers da registraziun. Malgrà ils dischavantatgs finanzials duain las burgaisas ed ils burgais avair la pussaivladad da dumandar er en l'avegnir documents da viadi en lur regiun da domicil, e quai senza stuair far viadis pli lungs.

Surdà ils premis da renconuschientscha e da promoziun en il sectur cultural
La regenza grischuna ha surdà ils premis da renconuschientscha e da promoziun en il sectur cultural per l'onn 2008. In premi da renconuschientscha da mintgamai 10'000 francs survegnan:
- Valentin Bearth ed Andrea Deplazes en appreziaziun da lur lavur creativa che metta accents en la nova architectura grischuna e che vegn renconuschida er ordaifer ils cunfins da noss chantun;
- Christian Buxhofer en renconuschientscha da ses engaschi multifar per las emnas da curs da musica, per il festival da musica e per il "ope(r)n air Waldbühne" ad Arosa;
- Simon Camartin en renconuschientscha da sias prestaziuns sco dirigent da musica nova, sco directur artistic dal festival da musica Menhir a Falera e sco intermediatur tranter musica grischuna e musica da l'Europa da l'ost;
- Albert Gasser en renconuschientscha da la perscrutaziun e da l'intermediaziun da l'istorgia da la baselgia e da la teologia, cunzunt da l'uvestgieu da Cuira e dal Grischun, tras experientschas realas, ma er tras reflexiun critica e savens spiertusa;
- Hans Hartmann, Thomas Keller ed Ueli Soom en renconuschientscha da lur lavur instancabla per il film e per il kino sco er da lur engaschi da 20 onns per il mantegniment dal "Kino Theater Rätia" a Tusaun sco center da cultura regiunal en il Grischun central;
- Erika Hössli en renconuschientscha da sia ovra litterara engaschada e da ses operar per la lingua e per la cultura dals Gualsers;
- Massimo Lardi en renconuschientscha da sia ovra litterara, en la quala el illustrescha il pitschen mund dal Puschlav, surdond quel a la vasta belletristica taliana;
- Peer Schilperoord en renconuschientscha da sia lavur da perscrutaziun en il sectur da las plantas cultivadas alpinas sco er da ses grond engaschi per il mantegniment e per la promoziun da la varietad da las spezias en il Grischun;
- Gaudenz Signorell en renconuschientscha da sia ovra artistica, en la quala el sondescha en moda experimentala las pussaivladads dal medium "fotografia" e retegna en moda subtila ed insistenta impressiuns ed experientschas intimas da la patria e da pajais lontans.

Premis da promoziun
In premi da promoziun da mintgamai 7'000 francs survegnan Barbara-David Brüesch, teatrista, Daniela Candrian, chantadura, Gian Häne, artist figurativ, Ervin Huonder, musicist, Andrea Paganini, scienzà da litteratura, Annina Sedlacek, actura/mimicra, Dario Sisera, musicist, Roman Weishaupt, teatrist, e Dominik Zehnder, sculptur.
Ils premis vegnan surdads en il rom d'ina festa che ha lieu venderdi, ils 21 da november 2008, a las 17.15 en la sala dal cussegl grond a Cuira.
La regenza surdat mintga onn premis a persunas che lavuran en las differentas spartas culturalas. Cun ils premis da renconuschientscha duain artistas ed artists vegnir undrads ed onurads per la lavur ch'ellas e ch'els han prestà fin ussa sin ils differents champs culturals. Cun ils premis da promoziun duain vegnir encuraschads cunzunt artistas ed artists pli giuvens da cuntinuar e da sviluppar vinavant la via culturala ch'ellas e ch'els han tschernì. Per prestaziuns culturalas e scientificas extraordinarias po vegnir surdà il premi grischun da cultura che vala sco il premi il pli aut dal chantun Grischun en il sectur cultural. Cuntrari als premis da promoziun e da renconuschientscha na vegn el betg surdà mintga onn.

Da vischnancas e da regiuns
Scuol: La revisiun totala da la lescha davart l'incassament da taxas da cura e da taxas per la promoziun dal turissem da la vischnanca da Scuol dals 3 d'avust 2008 vegn approvada.

Contribuziuns chantunalas a differentas instituziuns
Project "Museum & Scola": Al project "Museum & Schule | Museum & Scola | Museo & Scuola" vegn concedida per l'onn 2009 ina contribuziun unica da 30'000 francs.
Agid umanitar: Per totalmain quatter projects d'agid umanitar a l'exteriur ha la regenza deliberà tut en tut 38'000 francs. Da quai vegnan pajads 20'000 francs a la Caritas Svizra a favur da l'acziun d'agid d'urgenza per las victimas da las inundaziuns en l'India dal nord.

Projects da vias
La regenza ha approvà totalmain 2'010'000 francs per construir e per sanar ils suandants trajects da vias:
- via naziunala A13: lavurs d'impressari, sanaziun dal tunnel dal San Bernardin
- via naziunala A28: lavurs d'impressari, sviament da Küblis

Chanzlia chantunala dal Grischun

Gremi: regenza
Funtauna: rg chanzlia chantunala dal Grischun