Cuntegn da la pagina

La cumissiun per sanadad e fatgs socials beneventa la participaziun dal chantun a duas cunvegnas interchantunalas

  • Erste Mitteilung
  • Neuen Beitrag einfügen
Durant la sessiun d'october vegn il cussegl grond a s'occupar tranter auter cun la participaziun dal chantun Grischun a la cunvegna interchantunala davart la medischina fermamain spezialisada e cun la participaziun dal chantun Grischun a la cunvegna interchantunala davart las instituziuns socialas. Sut il presidi dal deputà Carlo Portner ha la cumissiun dal cussegl grond per sanadad e fatgs socials (CSF) predeliberà las duas missivas da la regenza per mauns dal cussegl grond. A la sesida da la cumissiun èn sa participads er la cussegliera guvernativa Barbara Janom Steiner ed il cusseglier guvernativ Hansjörg Trachsel.

Cunvegna interchantunala davart la medischina fermamain spezialisada (CIMFS)
Sco quai che la regenza menziunescha en sia missiva, intenziunescha la cunvegna la planisaziun naziunala da la medischina fermamain spezialisada, e quai en moda communabla tras ils chantuns. En il futur vegni a dar mo pli ina suletta planisaziun che vegn purtada communablamain da tut ils chantuns. Questa planisaziun communabla permetta in provediment effizient e d'auta qualitad da la populaziun svizra cun prestaziuns medicinalas fermamain spezialisadas. La furniziun da questas prestaziuns pretenda tschertas capacitads en furma da persunal e d'infrastructura. La cunvegna prevesa la pussaivladad d'attribuir prestaziuns da la medischina fermamain spezialisada er ad ospitals dal center ed uschia er a l'ospital chantunal dal Grischun.

Cunvegna interchantunala davart las instituziuns socialas (CIIS)
Questa cunvegna interchantunala ha l'intent da pussibilitar a persunas che han basegns spezials d'assistenza e da promoziun da vegnir recepidas senza difficultads en instituziuns adattadas che sa chattan ordaifer lur chantun da domicil. Ella regla la collavuraziun tranter il chantun da staziunament d'ina instituziun ed il chantun da domicil da persunas ch'èn collocadas ordaifer il chantun. Il champ d'applicaziun da la CIIS cumpiglia ils quatter secturs chasas d'uffants e da giuvenils, instituziuns per l'integraziun professiunala e sociala da persunas creschidas cun impediment, instituziuns per purschidas staziunaras da terapia e da reabilitaziun en il sectur da las dependenzas ed instituziuns per la scolaziun speziala externa. En il chantun Grischun mancan en tscherts secturs instituziuns spezialisadas uschia ch'i sto vegnir fatg quint pli e pli en il futur cun plazzaments extrachantunals.

La cumissiun suonda – suenter avair discutà ils dus projects en moda intensiva – l'argumentaziun da la regenza. Tenor quella tegna la participaziun dal chantun Grischun a las duas cunvegnas interchantunalas adequatamain quint dals interess dal chantun Grischun. Perquai propona ella al cussegl grond da consentir a la participaziun dal chantun a las duas cunvegnas.

Gremi: cumissiun per sanadad e fatgs socials
Funtauna: rg cumissiun per sanadad e fatgs socials
Neuer Artikel