Ils registers d'abitantas e d'abitants da las vischnancas vegnan
unifitgads er en il Grischun. Per quest intent ha la regenza grischuna
relaschà disposiziuns transitoricas per l'execuziun da la lescha
federala davart l'armonisaziun dals registers. Quellas entran en vigur
il 1. d'october 2008.
Il project da l'armonisaziun dals registers è vegnì inizià da la
confederaziun. I sa tracta d'unifitgar ils registers d'abitantas e
d'abitants en ils chantuns ed en las vischnancas sco er ils registers da
persunas da la confederaziun en il sectur dal stadi civil, da las
persunas estras sco er da las fugitivas e dals fugitivs. Ils differents
registers vegnan midads uschia ch'els pon vegnir cumparegliads en
l'entira Svizra areguard il cuntegn, areguard la nomenclatura ed
areguard l'actualitad e ch'els pon vegnir preparads per la transmissiun
electronica standardisada da datas. Talas retschertgas automatisadas èn
ina part fundamentala dal nov sistem da dumbrar la populaziun.
Las disposiziuns transitoricas ch'èn vegnidas relaschadas da la
regenza reglan - sin il stgalim da l'ordinaziun - las lavurs da
realisaziun da l'armonisaziun dals registers. Ellas duain dar la
pussaivladad a las vischnancas da realisar l'armonisaziun en moda
effizienta e raschunaivla. Concretamain vegnan regladas tranter auter la
gestiun dals registers d'abitantas e d'abitants tras las vischnancas sco
er la colliaziun a la plattafurma centrala d'informatica e da
communicaziun da la confederaziun SEDEX. Per questa colliaziun ston las
vischnancas cumprar da princip fin la fin da l'onn 2008 ina software
adattada.
Ultra da quai fixeschan las disposiziuns transitoricas, co ch'il
register federal dals edifizis e da las abitaziuns (REA) sto vegnir
rectifitgà per pudair manar in register actual dals objects. Da nov han
las vischnancas er la pussaivladad d'introducir ina numeraziun uffiziala
da las abitaziuns. La finala reglan las disposiziuns transitoricas la
transmissiun generala da datas ed il barat da datas sco er l'integraziun
dal nov numer d'assicuranza da la AVS en ils registers. Per sustegnair
las vischnancas tar lur lavurs da realisaziun ha il chantun Grischun
stgaffì in post spezialisà per l'armonisaziun dals registers, e quai tar
il departament d'economia publica e fatgs socials.
Mess en vigur la revisiun da la lescha davart la protecziun
da datas
La regenza grischuna ha mess en vigur per il 1. d'october 2008 la
revisiun parziala da la lescha chantunala davart la protecziun da datas.
Il cussegl grond aveva approvà questa revisiun parziala ils 31 d'avust
2006 en il rom da l'optimaziun da l'organisaziun giudiziala chantunala.
Cunter questa revisiun parziala n'eri betg vegnì fatg in referendum.
La revisiun parziala da la lescha davart la protecziun da datas sa
restrenscha a quellas adattaziuns a las cunvegnas da Schengen/Dublin,
las qualas èn absolutamain necessarias. Quellas pretendan tranter auter
che la regulaziun legala haja da valair per tut las elavuraziuns da
datas che vegnan fatgas dad organs chantunals e communals. En cas ch'ils
dretgs d'ina persuna vegnan violads tras in'elavuraziun da sias datas,
sto questa persuna plinavant pudair sa volver cun in med legal ad ina
instanza giudiziala. Da nov ha er l'autoritad da surveglianza il dretg
da far recurs.
La regenza beneventa la revisiun parziala da la lescha
federala davart l'aviatica
La revisiun parziala da la lescha federala davart l'aviatica, che
vegn proponida da la confederaziun, vegn da princip beneventada da la
regenza grischuna. En sia resposta da consultaziun suttastritga ella la
regulaziun proponida, tenor la quala i dastgan vegnir construids en
l'avegnir - en ina dimensiun limitada - edifizis e stabiliments tar
plazzas externas d'atterrament. Per il chantun muntagnard Grischun ha
questa pussaivladad cunzunt ina impurtanza per la cultivaziun dal guaud.
La regenza pretenda che questa soluziun stoppia perquai vegnir
mantegnida.
Percunter vegnan refusadas l'introducziun d'ina taxa da surveglianza
sco er la nova regulaziun dals custs per la segirezza da sgol. Qua tema
la regenza che quai haja consequenzas decisivas per las plazzas
aviaticas regiunalas pertutgadas sco er per lur utilisadras e per lur
utilisaders. Perquai ch'i sajan anc avertas numerusas dumondas, propona
la regenza da spustar la nova regulaziun da las taxas per la segirezza
da sgol sin la proxima revisiun.
La revisiun da la lescha federala davart la concurrenza
illoiala vegn beneventada
La regenza grischuna sustegna la revisiun planisada da la lescha
federala davart la concurrenza illoiala. Il project vul ina meglra
protecziun cunter l'engion da cudeschs d'adressas, cunter sistems da
lavina e cunter cundiziuns generalas da fatschenta abusivas. Da nov
duain er ils dretgs da la confederaziun da purtar plant vegnir
extendids, ed i duai vegnir stgaffida la basa legala per la
collavuraziun cun autoritads da surveglianza estras per cumbatter
metodas da fatschenta illoialas transcunfinalas. En sia resposta da
consultaziun supplitgescha la regenza la confederaziun d'examinar, sch'i
na dettia betg anc in ulteriur basegn d'agir en il cumbat cunter
cumportaments da fatschenta illoials.
La regenza vul ina meglra protecziun dals reservats
d'utschels da l'aua e d'utschels migrants
La regenza grischuna sustegna las stentas da la confederaziun
d'integrar otg territoris supplementars en l'inventari dals reservats
d'utschels da l'aua e d'utschels migrants d'impurtanza naziunala. Da nov
duai er vegnir rinforzada en ils reservats la protecziun cunter
disturbis tras il diever da temp liber che vegn pli e pli grond.
Fin ussa ha la confederaziun determinà 28 tals reservats per la
protecziun dals utschels migrants sco er dals utschels da l'aua e da
palì che vivan en Svizra. Sco che la regenza scriva en sia resposta da
consultaziun tar la revisiun parziala da l'ordinaziun davart ils
reservats d'utschels da l'aua e d'utschels migrants d'impurtanza
internaziunala e naziunala, na tangheschan ils otg novs reservats previs
betg il Grischun.
Da vischnancas e da regiuns
Grono: La revisiun parziala da la constituziun communala da la
vischnanca da Grono, ch'è vegnida concludida a chaschun da la votaziun a
l'urna dals 22 da zercladur 2008, vegn approvada.
Grischun dal nord: La midada dal plan directiv regiunal "Deposit da
material Scanvetg", ch'è vegnida concludida da la corporaziun regiunala
dal Grischun dal nord ils 6 da november 2007, vegn approvada cun
cundiziuns e declerada sco lianta per las autoritads chantunalas.
Engiadina bassa: Il plan directiv regiunal "Explotaziun da material
e gestiun da ruments", ch'è vegnì concludì da la regiun d'Engiadina
bassa ils 14 da favrer 2008, vegn approvà e declerà sco liant per las
autoritads chantunalas
Samignun: La regenza approvescha il contract tranter il chantun
Grischun e la vischnanca da Samignun per laschar surpigliar la polizia
chantunala dal Grischun incumbensas da la polizia communala. La plazza
supplementara vegn finanziada da la vischnanca.
Contribuziuns chantunalas a differentas instituziuns
Project "SIKART FUTURE 2008-2011": Il project "SIKART FUTURE
2008-2011" vegn sustegnì cun ina contribuziun da 10'868 francs. Quest
project prevesa da cumplettar il lexicon biografic d'artistas e
d'artists che vegn mess a disposiziun en l'internet tras l'institut
svizzer per la scienza d'art.
Chanzlia chantunala dal Grischun
Gremi: regenza
Funtauna: rg chanzlia chantunala dal Grischun