Il chantun Grischun adatta sia legislaziun al nov dretg da persunas
estras ed al nov dretg d'asil da la confederaziun. La nova lescha
introductiva tar la legislaziun davart las persunas estras e davart ils
fatgs d'asil stgaffescha tranter auter la basa legala per l'integraziun
da persunas estras en il chantun Grischun. La regenza grischuna ha
deliberà la missiva correspundenta per mauns dal cussegl grond. Quel
vegn a tractar questa fatschenta en la sessiun da december.
Il settember 2006 avevan las votantas ed ils votants svizzers
acceptà en ina votaziun da referendum la lescha federala davart las
persunas estras sco er ina revisiun parziala da la lescha d'asil. Tuts
dus relaschs pretendan ch'il dretg chantunal vegnia adattà. In punct
central da la lescha introductiva è la basa per las mesiras
d'integraziun futuras dal chantun. Quellas vegnan concepidas tenor il
princip "pretender e promover". Ina integraziun persistenta da las
persunas estras duai distgargiar a lunga vista ils custs en il sectur da
la segirezza publica e sociala.
La promoziun da l'integraziun vegn chapida sco incumbensa
interdisciplinara ch'è tant chaussa da la confederaziun, dals chantuns
sco er da las vischnancas. En emprima lingia duai la promoziun da
l'integraziun avair lieu en il rom da las structuras regularas
existentas, sco en scolina, en scola, entaifer la furmaziun
professiunala, sin il martgà da lavur, tar ils fatgs sanadad ed en las
instituziuns da la segirezza sociala. En spezial duai vegnir tegnì quint
dals basegns da l'integraziun da las dunnas, dals uffants e dals
giuvenils. Plinavant prevesa la nova lescha la pussaivladad ch'il
chantun e che las vischnancas pon pajar contribuziuns finanzialas a
projects ed a mesiras d'integraziun. Latiers tutgan projects che
n'appartegnan betg al champ d'incumbensas da las structuras regularas,
sco p.ex. projects da la promoziun da la lingua u da la promoziun
tempriva. Ina premissa, per ch'ina integraziun haja success, èn en
spezial enconuschientschas linguisticas suffizientas. Ultra da quai èsi
previs che las autoritads possian far cunvegnas d'integraziun cun las
persunas estras e che questas cunvegnas giajan pli lunsch ch'il dretg
federal.
Plinavant cuntegna la lescha las cundiziuns generalas, las reglas da
cumpetenza e las disposiziuns da procedura per applitgar las mesiras
repressivas en il dretg da persunas estras.
Gremi: regenza
Funtauna: rg chanzlia chantunala dal Grischun