La regenza grischuna ha approvà trais ulteriuras cunvegnas davart fusiuns da vischnancas. I sa tracta da la fusiun da las vischnancas dad Andeer, da Clugén e da Pignieu a la vischnanca dad Andeer, da las vischnancas da Flond e da Surcuolm a la vischnanca da Mundaun sco er da las vischnancas da Praden e da Tschiertschen a la vischnanca da Tschiertschen-Praden. La regenza ha deliberà las missivas correspundentas e propona al cussegl grond da metter en vigur las fusiuns per il 1. da schaner 2009. Il cussegl grond vegn a tractar las fatschentas en la sessiun da december.
Sch'il cussegl grond accepta questas trais fusiuns da vischnancas, sa reducescha il dumber da vischnancas dal Grischun da 203 a 190 per il cumenzament da l'onn 2009.
Gia en la sessiun d'avust aveva il cussegl grond approvà las fusiuns da las vischnancas da Veulden, da Sched, da Tràn e da Tumegl a la nova vischnanca da Tumegl, da las vischnancas da Tavau e da Wiesen a la vischnanca da Tavau sco er da las sis vischnancas da la Val Müstair a la nova vischnanca da vallada da Val Müstair. Tenor l'artitgel 64 da la constituziun dal chantun Grischun promova il chantun la fusiun da vischnancas per garantir che lur incumbensas vegnian ademplidas en moda cunvegnenta ed economica. Ultra da quai po il chantun pajar contribuziuns per promover fusiuns. La nova vischnanca dad Andeer survegn dal chantun ina contribuziun da promoziun en la summa da totalmain 1'225'000 francs. Per la nova vischnanca da Mundaun importa la contribuziun da promoziun 900'000 francs e per la nova vischnanca da Tschiertschen-Praden è previsa ina contribuziun da 2'550'000 francs.

Gremi: regenza
Funtauna: rg chanzlia chantunala dal Grischun