Cuntegn da la pagina

Il consum d'electricitad è sa sminuì minimalmain - la producziun d'electricitad è sut la media

  • Erste Mitteilung
  • Neuen Beitrag einfügen
Il consum total d'electricitad en il Grischun è sa sminuì per ca. 2.1 pertschient cumpareglià cun l'onn precedent. Perquai ch'ils affluents èn stads sut la media è - cumpareglià cun la media da plirs onns - la producziun d'electricitad da las ovras idraulicas dal Grischun stada per 10 pertschient pli pitschna.

Il consum d'electricitad è sa reducì minimalmain
En la perioda 2006/2007 (october 2006 fin settember 2007) è resultà en il Grischun in consum total d'electricitad da 1'892 milliuns uras kilowatt (perioda anteriura 1'932 milliuns uras kilowatt). Uschia è il consum d'electricitad 2.1 pertschient sut il record da l'onn precedent e 0.7 pertschient sur la valur media dal consum d'electricitad dals ultims 4 onns. En tut la Svizra è il consum d'electricitad sa sminuì durant la medema perioda en il medem rom sco en il Grischun, numnadamain per 2.3 pertschient.
En la perioda 2006/2007 hai dà las suandantas midadas tar las singulas gruppas da consumentas e da consuments: tar la gruppa economia da chasa, mastergn, agricultura, prestaziuns da servetsch po vegnir registrà ina reducziun da 3.1 pertschient visavi l'onn precedent (da 1'601 milliuns uras kilowatt a 1'552 milliuns uras kilowatt), tar las viafiers ina reducziun da var 3.2 pertschient (da 96 milliuns uras kilowatt a 93 milliuns uras kilowatt) e tar l'industria in augment da var 5.1 pertschient (da 235 milliuns uras kilowatt a 247 milliuns uras kilowatt). Circa 58 pertschient dal consum d'electricitad vegn duvrà durant il mez onn d'enviern. La reducziun tar la gruppa economia da chasa, mastergn, agricultura, prestaziuns da servetsch resulta cunzunt dal fatg che l'enviern passà è stà miaivel e ch'ins ha duvrà pervia da quai damain electricitad. Ultra da quai poi er esser ch'i sa fetschia valair - ultra da las mesiras per augmentar l'effizienza da l'energia - er ina pli gronda sensibilitad tar las consumentas e tar ils consuments che sa stentan ussa pli fitg da spargnar energia. L'augment dal consum en il sectur da l'industria reflecta cleramain l'andament da la conjunctura ch'è stà pli favuraivel.

La producziun d'electricitad è sut la media
La producziun d'electricitad da tut las ovras idraulicas en il Grischun ha importà durant l'onn idrologic 2006/07 (october 2006 fin settember 2007) 6'991 uras da kilowatt. Cumpareglià cun la perioda da l'onn precedent importa quai bain in augment da 25 pertschient. Però cumpareglià cun la media da plirs onns è la producziun d'electricitad per circa 10 pertschient pli pitschna. Responsabels per questa producziun èn stadas las precipitaziuns ch'èn stadas sut la media sco er ils affluents pli pitschens ch'èn resultads da quai.

Ils tschains d'aua èn sut la media
Las entradas dals tschains d'aua dal chantun (taglia sin implants idraulics) sa sbassan circa en proporziun cun la producziun d'electricitad. Perquai èn las entradas da 42.2 milliuns francs da l'onn 2007 correspundentamain er sut la media. Quai èn circa 7 pertschient damain che las entradas da 45.4 milliuns francs en in onn normal.
Las vischnancas concessiunarias survegnan en total entradas or dal tschains d'aua en circa la medema dimensiun sco il chantun. Tras la producziun d'electricitad ch'è stada sut la media vegnan er ils tschains d'aua ad esser correspundentamain bass l'onn 2007.

Infurmaziun per las medias:
Las graficas davart il consum d'electricitad e davart la producziun d'electricitad en il Grischun stattan a disposiziun sut www.energie.gr.ch / rumantsch sut Download / Statistik).

Gremi: uffizi d'energia e da traffic
Funtauna: rg uffizi d'energia e da traffic
Neuer Artikel