La regenza vegn a suttametter al cussegl grond en la sessiun d'october 2008 la missiva davart la revisiun parziala da la lescha chantunala da taglia. Sut la direcziun da Franco Quinter ha la cumissiun per economia e taxas (CET) predeliberà la missiva per mauns dal cussegl grond. Er il cusseglier guvernativ Martin Schmid è stà preschent a questa sesida.
Tras la revisiun duai la lescha da taglia dal Grischun vegnir adattada en dus puncts al dretg fiscal federal armonisà. D'ina vart vegnan las disposiziuns per levgiar l'imposiziun economica dubla adattadas a las novas reglas da la lescha federala davart la taglia federala directa. Da l'autra vart vegn la disposiziun davart las facilitaziuns fiscalas per domiciliar interpresas novas u per mantegnair interpresas existentas midada en quel senn, ch'ils dischavantatgs actuals dal lieu pon vegnir eliminads. Plinavant duai la cumpetenza da relaschar debits fiscals fitg gronds vegnir surdada a la regenza.
Suenter avair discutà il project en moda intensiva ha la cumissiun concludì unanimamain d'entrar en il project e da proponer al cussegl grond da deliberar il sboz da lescha da la regenza.
Infurmaziuns:
president da la cumissiun Franco Quinter, tel. 081 650 05 05
Gremi: cumissiun per economia e taxas
Funtauna: rg cumissiun per economia e taxas