Durant las emnas passadas èn vegnidas stgarpadas en tut 18 nursas sin pliras alps da nursas a Sursaissa ed en Lumnezia. Sco chaschunader dals donns è vegnì identifitgà in luf. In'analisa dal DNA ch'è vegnida fatga a l'universitad da Losanna conferma la spezia: canis lupus – ubain luf. Per il mument na pon dentant anc vegnir fatgas naginas indicaziuns davart la schlattaina u schizunt davart l'individi. Ulteriuras analisas èn en lavur.
L'uffizi da chatscha e pestga parta dal fatg ch'i na sa tractia betg da quel animal che sa trategna gia dapi onns tranter Glion e Mustér, oravant tut da la vart sanestra da la Surselva. Eventualmain èsi il luf ch'è vegnì observà la primavaira passada al pass da l'Alpsur.

Infurmaziuns:
- dr. Georg Brosi, manader da l'uffizi da chatscha e pestga, tel. 081 257 38 92
- Hannes Jenny, biolog da selvaschina, uffizi da chatscha e pestga, tel. 081 257 38 92

Gremi: uffizi da chatscha e pestga dal Grischun
Funtauna: rg uffizi da chatscha e pestga dal Grischun