Cuntegn da la pagina

La regenza prenda enconuschientscha dals resultats da la consultaziun tar la NGF grischuna

  • Erste Mitteilung
  • Neuen Beitrag einfügen
La regenza grischuna ha prendì enconuschientscha dal resultat da la consultaziun en connex cun la nova concepziun da la gulivaziun da finanzas e da la repartiziun da las incumbensas tranter il chantun e las vischnancas (NGF grischuna). Cun plaschair constatescha la regenza ch'il project - e sia concepziun - chattan gronda acceptanza. Uschia po vegnir observà l'urari previs, ed il project po vegnir suttamess al cussegl grond en la sessiun d'avrigl 2009. L'entrada en vigur vegn coordinada cun la revisiun dal cudesch da procedura penala svizzer e vegn perquai spustada sin il 1. da schaner 2011.

Fin la fin d'avust 2008 han las autoritads, las partidas e las organisaziuns gì la chaschun da prender posiziun davart il sboz da consultaziun da la NGF grischuna. A la consultaziun han prendì part tut en tut 162 vischnancas politicas, numerus circuls e bleras corporaziuns regiunalas, 7 partidas u gruppaziuns da partidas sco er stgars 50 federaziuns ed organisaziuns. A chaschun da sia ultima sesida ha la regenza prendì enconuschientscha dal resultat da la consultaziun.

Constataziuns sin basa da la procedura da consultaziun
Da princip vegn ina nova concepziun da la gulivaziun da finanzas e da la repartiziun da las incumbensas tranter il chantun e las vischnancas resguardada sco necessaria e perquai beneventada da la gronda part da las participantas e dals participants da la consultaziun. Concernent la gulivaziun da finanzas vegni savens pretendì d'extender la basa per il potenzial da resursas da las vischnancas (p.ex. cumpigliond las taglias sin immobiglias, sin midada da maun e sin il gudogn tras la vendita da bains immobigliars). Remartgas per part criticas datti areguard il detretschament da las incumbensas. Da princip vegn in detretschament en direcziun da las vischnancas giuditgà en moda pli critica ch'in detretschament en direcziun dal chantun. In detretschament da las incumbensas en direcziun da las vischnancas vegn savens collià cun la tema d'ina reducziun da las prestaziuns resp. da la qualitad. En vista a la cumplexitad dal project èsi chapaivel che bleras participantas e che blers participants da la consultaziun han prendì posiziun mo davart singuls secturs, uschia cunzunt davart la scola, davart ils fatgs socials e davart ils ospitals. Il sdebitament parzial vegn sustegnì mo en cumbinaziun cun cundiziuns resp. cun mesiras accumpagnantas. La regenza punctuescha che la NGF grischuna è in project da refurma integral che sto vegnir contemplà en moda cumplessiva e che porscha mo sco unitad la chaschun unica da preschentar e da cumpensar las consequenzas finanzialas da la refurma en ina bilantscha globala.

Tge vul la NGF grischuna?
La NGF grischuna è in dals pli gronds projects da refurma federalistics ch'è vegnì prendì per mauns insacura en il chantun Grischun. Perquai fa la regenza endament la finamira da quest pachet da refurma impurtant.
La gulivaziun da finanzas che vala dapi l'onn 1957 en il Grischun sa mussa sco pauc transparenta, n'è strusch reglabla e dat fauss impuls. Tranter il chantun e las vischnancas exista ultra da quai in entretschament d'incumbensas e da finanziaziuns che n'è betg pli survesaivel. Ina nova concepziun da la gulivaziun da finanzas e da la repartiziun da las incumbensas tranter il chantun e las vischnancas duai reducir duplicitads e moviments da finanzas cuntracurrents. La NGF grischuna duai augmentar la libertad d'agir, l'atgna responsabladad e la capacitad finanziala tant da las vischnancas sco er dal chantun. I duai vegnir introducida ina gulivaziun da resursas e da grevezzas dal tuttafatg nova, e las incumbensas duain vegnir detretschadas uschenavant sco pussaivel. Sco cumplettaziun da quai èsi previs - cur ch'il nov sistem vegn introducì - da sdebitar parzialmain las vischnancas che han debits sproporziunads. In augment material resp. ina reducziun materiala da las prestaziuns na fa dentant betg part da quest project.

L'ulteriur urari
Elavurond vinavant il project vegn la regenza a sa fatschentar intensivamain cun ils giavischs da las participantas e dals participants da la consultaziun. Resguardond l'optica cumplessiva vegn ella ad empruvar da tegnair quint uschè bain sco pussaivel da tut ils differents interess. Perquai ch'il termin da l'entrada en vigur da la procedura penala e civila federala è vegnì spustà, ha la regenza gia decidì da metter en vigur la NGF grischuna pir per il 1. da schaner 2011. La NGF grischuna tegna quint da las consequenzas finanzialas che resultan per il chantun e per las vischnancas tras la realisaziun da la procedura penala e civila federala. Perquai sto la NGF grischuna vegnir messa en vigur il medem mument sco il project federal. Il termin spustà n'ha dentant naginas consequenzas per l'urari oriund; la tractativa parlamentara è previsa per la sessiun d'avrigl 2009.

Infurmaziuns:
- cusseglier guvernativ dr. iur. Martin Schmid, schef dal departament da finanzas e vischnancas, tel. 081 257 32 01
- Thomas Kollegger, uffizi da vischnancas, tel. 081 257 23 81

Gremi: regenza
Funtauna: rg chanzlia chantunala dal Grischun
Neuer Artikel