Cuntegn da la pagina

Da vischnancas e da regiuns

  • Erste Mitteilung
  • Neuen Beitrag einfügen
Regiun Grischun dal nord: La regenza ha approvà l'ordinaziun davart la realisaziun da la planisaziun directiva regiunala dal Grischun dal nord ch'è vegnida concludida da la radunanza da tala regiun ils 6 da november 2007. A medem temp ha ella prendì enconuschientscha dal program da plirs onns concernent il svilup regiunal dal territori per la perioda 2007 - 2010. Per realisar quest program ha ella deliberà in credit da 110'000 francs.
Puntraschigna: Il project "rempar per la protecziun cunter crudada da crappa God Languard" da la vischnanca da Puntraschigna vegn approvà. Als custs vegn garantida ina contribuziun da maximalmain 81'600 francs.
Fanas: A la vischnanca da Fanas vegn garantida ina contribuziun da 72'000 francs per la 4. etappa da la renovaziun dal provediment d'aua.
Lumnezia-Val S. Pieder: Il plan per il svilup dal guaud Lumnezia-Val S. Pieder vegn approvà. Quel regla l'utilisaziun futura dal guaud e fixescha las finamiras e las strategias da cultivaziun da la selvicultura a lunga vista.

Contribuziuns chantunalas a differentas instituziuns
Tgira da monuments: Il chantun sa participescha cun totalmain 655'700 francs vi da differents projects da la tgira da monuments. Sustegnidas vegnan la restauraziun generala da la chasa-pravenda catolica a Sagogn, la restauraziun generala da la chasa Trepp a Tusaun, la restauraziun da l'oratori da S. Anna a Puschlav-Borgo, la renovaziun da la baselgia parochiala evangelic-refurmada a Tschlin, la restauraziun dal tetg da la baselgia refurmada a Vuorz sco er la midada da construcziun cun restauraziun generala da la chasa Willi a Lantsch.
Scola professiunala a Cuira: La dumonda per endrizzar da nov il local da demonstraziun "installaziuns sanitaras/stgaudament/stagnaria/tolaria/tecnica da chasa" en la scola professiunala a Cuira vegn approvada. A l'instituziun responsabla vegn garantida ina contribuziun chantunala da construcziun da maximalmain 228'800 francs.
Biblioteca per umans tschorvs ed impedids da la vesida: Als custs per digitalisar e per structurar ils cudeschs auditivs analogs da la biblioteca svizra per umans tschorvs ed impedids da la vesida vegn deliberada ina contribuziun unica da 7'200 francs.
Exposiziun Lulo Tognola: L'exposiziun dal graficher Lulo Tognola che ha lieu ils mais da schaner e da favrer 2009 a Bellinzona e l'ediziun d'in catalog latiers vegnan sustegnidas cun ina contribuziun dad 8'000 francs.
Societad da musica da Trimmis: A la societad da musica da Trimmis vegn concedida ina contribuziun da maximalmain 13'500 francs per unifurmas novas.
Club da tennis da Panaduz: Per restaurar la chasa dal club survegn il club da tennis da Panaduz ina contribuziun da maximalmain 23'000 francs or dal fond da sport.

Projects da vias
La regenza ha approvà totalmain 180'000 francs per construir e per sanar il suandant traject da via:
- via taliana: lavurs d'impressari, Soazza - Pian San Giacomo

Chanzlia chantunala dal Grischun

Gremi: regenza
Funtauna: rg chanzlia chantunala dal Grischun
Neuer Artikel