Cuntegn da la pagina

La maturitad professiunala, ina istorgia da success

  • Erste Mitteilung
  • Neuen Beitrag einfügen
Il chantun Grischun ha la quota la pli auta da maturandas e da maturands professiunals cumpareglià cun ils auters chantuns da la Svizra. La maturitad professiunala (MP) è la via prospectiva dal sistem da furmaziun svizzer. Per promover la maturitad professiunala ha l'uffizi per la furmaziun professiunala dal Grischun lantschà - ensemen cun l'uffizi federal da furmaziun professiunala e da tecnologia - ina campagna da reclama per la maturitad professiunala.

La maturitad professiunala giauda ina gronda stima en la politica da furmaziun dal chantun Grischun. En il program da la regenza 2005 fin 2008 è fixà explicitamain sco mesira: "Augmentar la quota tar la maturitad professiunala d'emprendistas e d'emprendists." Il chantun Grischun ha la quota la pli auta da maturandas e da maturands professiunals cumpareglià cun ils auters chantuns da la Svizra. L'onn 2007 importava la quota en tut la Svizra circa 12 pertschient ed en il chantun Grischun stgars 16 pertschient.

La maturitad professiunala è in diplom da furmaziun autonom e pretensius che cumplettescha l'emprendissadi e che avra ina retscha da vias da furmaziun superiuras. Tgi che ha absolvì ina maturitad professiunala, dispona d'ina qualificaziun dubla, l'abilitad da lavurar sin ina professiun e l'abilitad dad ir a studegiar.

Ensemen cun l'uffizi federal da furmaziun professiunala e da tecnologia (UFFT), cun las scolas da maturitad professiunala e cun las scolas medias commerzialas en il chantun Grischun organisescha l'uffizi per la furmaziun professiunala ina campagna da reclama per la maturitad professiunala. Dapertut infurmeschan placats tematics dal UFFT davart la carriera professiunala. Accumpagnada vegn questa acziun da differentas activitads ch'il chantun organisescha: Ina nova broschura cuntegna infurmaziuns generalas ed infurmescha davart las differentas purschidas en il chantun. Per ch'ina persuna giuvna possia far la maturitad professiunala sco cumplement da l'emprendissadi, dovri la prontezza dals manaschis d'emprendissadi, perquai che las emprendistas ed ils emprendists van in mez di per emna dapli a scola. Percunter profitan ils manaschis da scolaziun da la furmaziun generala pli profunda gist er tras il pensar interdisciplinar da lur emprendistas e da lur emprendists. L'uffizi per la furmaziun professiunala sa drizza en in'acziun a tut ils manaschis d'emprendissadi ed als furnescha infurmaziuns davart questa via da furmaziun. Occurrenzas d'infurmaziun vegnan organisadas da las instituziuns purschidras.

La finamira da la campagna è quella da motivar umans giuvens da tscherner questa via da furmaziun. Uschia po la quota da la maturitad professiunala vegnir augmentada vinavant ed il chantun Grischun resta sin ils emprims rangs.

Gremi: uffizi per la furmaziun professiunala
Funtauna: rg uffizi per la furmaziun professiunala
Neuer Artikel