La regenza grischuna refusa l'iniziativa chantunala dal pievel "iniziativa.d'etica". Percunter suttametta ella al cussegl grond ina cuntraproposta che prevesa d'introducir en la scola populara ina lecziun da religiun per emna sco er ina lecziun "enconuschientscha da las religiuns ed etica" per emna ch'è obligatorica per tut las scolaras e per tut ils scolars. La regenza ha deliberà la missiva correspundenta per mauns dal cussegl grond. Questa fatschenta duai vegnir tractada en la sessiun da favrer 2009.

En la scola populara dal Grischun dattan las baselgias chantunalas da dretg public renconuschidas oz religiun a lur commembras ed a lur commembers. Las instituziuns ch'èn responsablas per la scola las mettan a disposiziun gratuitamain las localitads d'instrucziun. L'instrucziun da religiun - ch'è francada en la lescha e ch'è dotada cun duas lecziuns per emna - appartegna als roms obligatorics. Sa referind a la libertad da cretta e da conscienza e faschond ina decleraziun en scrit, pon las persunas cun la pussanza dals geniturs dentant dispensar lur uffant da l'instrucziun da religiun. Tenor ina retschertga na frequentan var 10 pertschient dals uffants betg l'instrucziun da religiun. La gronda part da quests uffants n'appartegna betg ad ina baselgia chantunala.
L'iniziativa dal pievel "iniziativa.d'etica", ch'è vegnida inoltrada ils 10 d'october 2007, vul ussa introducir ina instrucziun obligatorica d'etica en la scola populara. Questa instrucziun duai intermediar tant las valurs fundamentalas cristianas che valan en nossa societad sco er enconuschientschas da differentas religiuns. L'iniziativa vul er promover il pensar critic ed il giuditgar autonom. Questas finamiras vul l'iniziativa cuntanscher en l'instrucziun da religiun senza la cooperaziun da las baselgias chantunalas. Tras questa midada fundamentala dal sistem na duain - tenor la proposta da l'iniziativa - las baselgias chantunalas betg pli dar religiun. La regenza refusa questa midada dal sistem, er perquai ch'ella n'è betg necessaria per cuntanscher las finamiras da l'iniziativa.
Sco las duas baselgias chantunalas e sco l'ordinariat episcopal è er la regenza da l'avis ch'il model d'instrucziun per la furmaziun religiusa stoppia vegnir sviluppà vinavant. D'ina vart duai ina instrucziun da religiun resguardar ils interess da las commembras e dals commembers da las baselgias chantunalas. Da l'autra vart stoi dentant er vegnir fatg frunt a la smanatscha d'in analfabetissem religius. Memia blers uffants èn exponids al privel da far las scolas obligatoricas senza insumma vegnir introducids en la tradiziun religiusa da lur conturn e senza insumma sa fatschentar cun quella.
Per pudair concepir meglier il model d'instrucziun tenor ils basegns skizzads e per garantir ch'er quels uffants, che na frequentan betg l'instrucziun da religiun, survegnian ina furmaziun religiusa, fa la regenza ina cuntraproposta tar l'iniziativa. Quella cuntegna il model d'instrucziun 1+1 che vegn sustegnì da las baselgias chantunalas e che prevesa ina lecziun da religiun per emna sco er ina lecziun "enconuschientscha da las religiuns ed etica" per emna ch'è obligatorica per tut las scolaras e per tut ils scolars. L'instrucziun da religiun è sco fin ussa chaussa da las baselgias chantunalas. Per il nov rom "enconuschientscha da las religiuns ed etica" è percunter responsabla la scola. L'instrucziun sto sa cunfar cun la libertad da cretta e da conscienza respectivamain cun la libertad da religiun. Ella vegn a tractar dumondas eticas ed a considerar - sco en auters chantuns - teorias religiusas en moda surconfessiunala e cumparativa.
Cun sia cuntraproposta vul la regenza er sviluppar vinavant il partenadi cumprovà existent cun las baselgias chantunalas en il sectur da la furmaziun religiusa en la scola populara, e quai en l'interess da la populaziun dal Grischun.

Gremi: regenza
Funtauna: rg chanzlia chantunala dal Grischun