Cuntegn da la pagina

Infurmaziun davart la situaziun actuala dal sectur d'asil en il chantun Grischun

  • Erste Mitteilung
  • Neuen Beitrag einfügen
Dapi il zercladur 2008 - suenter ina lunga fasa sin in livel bass - s'augmenta il dumber da dumondas d'asil puspè fermamain. Cun ina midada da questa tendenza na poi betg vegnir fatg quint, almain betg durant ils mais d'enviern. Il chantun Grischun sto surpigliar 2,7% da tut las dumondas d'asil novas. Per pudair ademplir questa obligaziun da la lescha, prenda il chantun Grischun differentas mesiras per augmentar sia capacitad d'accoglientscha.

Il dumber da requirentas e da requirents d'asil ch'il chantun Grischun sto recepir è s'augmentà fermamain dapi il zercladur 2008. L'onn 2008 èn gia vegnids assegnads 281 requirentas e requirents d'asil al chantun Grischun. Quai è in augment da 106 persunas en cumparegliaziun cun l'onn precedent. Sin basa d'ina evaluaziun da la situaziun ch'è vegnida fatga da la confederaziun n'èsi betg da far quint ils proxims mais cun ina reducziun da las dumondas d'asil, uschia ch'il Grischun sto - tenor calculaziuns approximativas da la confederaziun - probablamain quintar cun circa 390 dumondas d'asil u cun in augment dad 80% fin la fin da l'onn.

In fatg engrevgiant è ultra da quai ch'il dumber da proceduras pendentas è creschì considerablamain tar la confederaziun pervia dal ferm augment da las dumondas. En ils centers d'accoglientscha vegnan fatgas pli e pli savens mo pli intervistas curtas. Uschia n'èn actualmain 75% da tut las requirentas e da tu ils requirents d'asil ch'èn vegnids assegnads al chantun Grischun, betg anc vegnids consultads davart lur motivs d'asil. Perquai ch'ils centers d'accoglientscha èn occupads fermamain, na pon er betg pli vegnir decididas là en emprima instanza tantas dumondas d'asil sco avant.

En consequenza da quest svilup en il sectur d'asil èn - cuntrari a las empermischuns da la confederaziun - ils chantuns sfurzads da recepir pli svelt ils novs cas e da metter a disposiziun ils alloschis correspundents. Perquai che las proceduras sa retardeschan, vegnan ils alloschis existents duvrads pli ditg che fin qua. Uschia dovri anc dapli plazzas. Pervia da questas novas circumstanzas è il chantun Grischun sfurzà d'augmentar cuntinuadamain sia purschida existenta da centers transitorics.

Per il mument dispona il chantun Grischun da totalmain 299 plazzas en centers collectivs, ils quals èn actualmain occupads a 96%. Tras quai ch'il center d'expulsiun "Flüeli" a Valzeina è vegnì transfurmà en in center transitoric, han pudì vegnir messas a disposiziun circa 40 plazzas novas per persunas cun ina procedura pendenta. Questas pussaivladads supplementaras da collocaziun sco er ils alloschis da reserva ch'èn avant maun pon dentant cuvrir il basegn mo a curta vista. Perquai ha l'uffizi da fatgs da polizia e da dretg civil dal Grischun gia cumenzà a tschertgar in ulteriur alloschi collectiv. Ins ha er cumenzà a metter a disposiziun alloschis da la protecziun civila sco reserva per recepir requirentas e requirents d'asil, en cas ch'il dumber da dumondas s'augmentass vinavant.

Tras la transfurmaziun dal center d'expulsiun èsi stà indispensabel da dischlocar las requirentas ed ils requirents d'asil refusads che han basegn d'agid d'urgenza. Nov persunas - che n'adempleschan dapi mais per gronda part betg lur obligaziun da partir da la Svizra e che na pon betg vegnir expulsadas per il mument - vegnan collocadas ad interim en la vischnanca dad Igis-Landquart en il center minimal "Waldau", per il qual igl è vegnì relaschà in urden da chasa spezial. Là survegnan ellas l'agid d'urgenza confurm al dretg constituziunal.

Tenor il tribunal federal cumpiglia l'agid d'urgenza - en il senn d'in agid transitoric - sulettamain ils meds ch'èn indispensabels per pudair surviver en ina situaziun d'urgenza, pia il nutriment, la vestgadira, in tetg ed il provediment medicinal da basa (sentenzia dal tribunal federal 2P.318/2004 dals 18 da mars 2005). L'agid d'urgenza che vegn prestà dal chantun Grischun correspunda a questas prescripziuns ed è cumparegliabel cun la pratica d'auters chantuns en quai che reguarda la prestaziun da l'agid d'urgenza.

Infurmaziuns:
- cussegliera guvernativa Barbara Janom Steiner, scheffa dal departament da giustia, segirezza e sanadad, tel. 081 257 25 01
- Heinz Brand, schef da l'uffizi da fatgs da polizia e da dretg civil dal Grischun,
tel. 081 257 25 21

Gremi: departament da giustia, segirezza e sanadad
Funtauna: rg departament da giustia, segirezza e sanadad
Neuer Artikel