En la sessiun da december 2008 vegn il cussegl grond a tractar trais ulteriuras fusiuns da vischnancas. I sa tracta concretamain da la fusiun da las vischnancas da Praden e da Tschiertschen a la vischnanca da Tschiertschen-Praden, da la fusiun da las vischnancas dad Andeer, da Pignieu e da Clugén a la vischnanca dad Andeer e da la fusiun da las vischnancas da Flond e da Surcuolm a la vischnanca da Mundaun. La regenza propona al cussegl grond en trais missivas separadas da metter en vigur las fusiuns per il 1. da schaner 2009.
Las cumissiuns predeliberantas ch'èn vegnidas incaricadas cun la predeliberaziun da questas trais fusiuns e che vegnan presidiadas da la deputada Clelia Meyer Persili (Praden / Tschiertschen), da la deputada Barbara Castelberg-Fleischhauer (Andeer / Pignieu / Clugén) e dal deputà Martin Candinas (Flond / Surcuolm) han predeliberà las missivas respectivas da la regenza per mauns dal cussegl grond en preschientscha dal cusseglier guvernativ Martin Schmid sco er da represchentantas e da represchentants da las autoritads da las vischnancas pertutgadas. En quest connex han tut las trais cumissiuns concludì unanimamain da proponer al cussegl grond la fusiun da las vischnancas menziunadas.
Sch'il cussegl grond suonda las recumandaziuns da sias cumissiuns predeliberantas ed approvescha medemamain questas trais fusiuns da vischnancas, sa reducescha il dumber da vischnancas en il Grischun - resguardond las fusiuns da vischnancas ch'èn gia vegnidas concludidas pli baud quest onn - da 203 a 190 per il cumenzament da l'onn 2009.

Infurmaziuns:
Fusiun Praden-Tschiertschen:
presidenta da la cumissiun Clelia Meyer-Persili, tel. 079 524 39 49

Fusiun Andeer, Pignieu, Clugén:
presidenta da la cumissiun Barbara Castelberg-Fleischhauer, tel. 078 620 69 86

Fusiun Flond-Surcuolm: president da la cumissiun Martin Candinas, tel. 078 841 66 86

Gremi: cumissiuns predeliberantas per fusiuns da vischnancas
Funtauna: rg cumissiuns predeliberantas per fusiuns da vischnancas