Cuntegn da la pagina

La regenza beneventa ils plans da fundar ina reserva da bilantscha per l'agricultura

  • Erste Mitteilung
  • Neuen Beitrag einfügen
La regenza grischuna beneventa da princip l'intenziun dal cussegl federal da fundar ina reserva da bilantscha che serva a finanziar mesiras accumpagnantas a favur da l'agricultura. Cun fixar ina nova basa legala en la lescha d'agricultura duai vegnir preparada concretamain la finanziaziun da mesiras accumpagnantas per il cas ch'i dat in eventuala convenziun da commerzi liber cun l'Uniun europeica (UE) en il sectur da victualias ed en il sectur agricul u per il cas ch'i dat ina nova cunvegna cun l'organisaziun mundiala da commerzi (OMC).
La regenza scriva en sia consultaziun a la confederaziun ch'ella saja cuntenta che las mesiras accumpagnantas vegnian consideradas sco necessarias, sche la convenziun da commerzi liber cun la UE u sch'ina cunvegna cun la OMC vegnan effectivamain concludidas. Il cussegl federal signaliseschia uschia ch'el piglia serius ils quitads da l'agricultura. Dentant è la regenza da l'avis che la finanziaziun concreta na saja insumma betg garantida. I saja plinavant da spetgar ch'ils plans da fundar ina reserva da bilantscha na vegnian betg ad esser suffizients per minimar las influenzas negativas considerablas ch'ina eventuala convenziun da commerzi liber vegn ad avair sin ils manaschis purils. Ultra d'ina finanziaziun garantida pretenda uschia la regenza ulteriurs meds finanzials che duain ir exclusivamain a favur da l'agricultura. Cun distribuir ils daners duai la finala er vegnir tegnì quint da las circumstanzas regiunalas.

Da vischnancas e da regiuns
Tenna: Per sanar il chanal d'allontanament d'aua Rütigada vegn garantida a la vischnanca da Tenna ina contribuziun chantunala da maximalmain 27'840 francs.
Alvaschagn: La revisiun parziala da la constituziun dal circul d'Alvaschagn dals 28 da settember 2008 vegn approvada.
Domat: La revisiun parziala da la constituziun da la vischnanca burgaisa da Domat vegn approvada.

Contribuziuns chantunalas a differentas instituziuns
Promoziun da l'integraziun: Per finanziar projects d'integraziun ha la regenza concedì ina contribuziun da 117'000 francs. L'onn 2008 survegnan en tut 11 projects ina contribuziun da promoziun per l'integraziun sociala da persunas estras che vivan en il chantun Grischun.
Almanacco Mesolcina e Calanca: L'ediziun dal "Almanacco Mesolcina e Calanca 2009" vegn sustegnida cun ina contribuziun da 6'000 francs.

Projects da vias
La regenza ha approvà totalmain 620'000 francs per construir e per sanar ils suandants trajects da vias:
- A13, A28, vias chantunalas: divers tunnels, furniziun da cumponentas da video

Chanzlia chantunala dal Grischun

Gremi: regenza
Funtauna: rg chanzlia chantunala dal Grischun
Neuer Artikel