Cuntegn da la pagina

La scola auta da pedagogia dal Grischun duai vegnir engrondida cun dus auditoris e cun ina mediateca

  • Erste Mitteilung
  • Neuen Beitrag einfügen
Ils edifizis da la scola auta da pedagogia dal Grischun (SAPGR) duain vegnir engrondids. Igl è planisà d'agiuntar dus novs auditoris sco er ina nova mediateca. Quai propona la regenza grischuna en sia missiva al cussegl grond che vegn a tractar il project la sessiun d'avrigl 2008.
La SAPGR ha surpiglià l'onn 2003 las localitads da l'anteriura scola da dunnas sin l'areal dal Kantengut a la Scalärastrasse a Cuira. Dapi quella giada porscha la SAPGR sco suletta instituziun dal chantun Grischun scolaziuns per persunas d'instrucziun. Actualmain frequentan 245 studentas e students la scola auta. Pervia da las relaziuns da spazi insuffizientas è la SAPGR sfurzada dapi ditg da prender a tschains locals supplementars. Ultra da quai na permettan ils locals actuals betg d'organisar prelecziuns per gruppas grondas. Per ademplir sias incumbensas en moda effizienta e favuraivla basegna la SAPGR dentant dus auditoris, en ils quals in'annada da scolaziun po vegnir instruida mintgamai communablamain. Ils novs auditoris duain esser situads directamain sper ils locals da gruppa. Quai permetta da realisar las furmas d'instrucziun giavischadas en gruppas grondas e pitschnas. Ultra da quai è planisada ina nova mediateca, la quala i duai esser lev da cuntanscher e la quala porscha suffizientamain plazzas da lavur. Actualmain ha la mediateca chattà suttetg en in edifizi provisoric. La nova mediateca duai daventar in lieu da scolaziun central, nua che las studentas ed ils students survegnan in access direct a las medias ed a la litteratura, uschia ch'ellas ed els pon lavurar independentamain.
L'avertura dal nov tract cun ils auditoris e cun la mediateca vegn fatga sin il plaun dal foyer existent, e quai da la vart, per lung da l'aula odierna. Il project proponì persvada la regenza tant areguard sia concepziun sco er areguard sia funcziunalitad ed areguard sia economia. Cun questas mesiras architectonicas po la SAPGR optimar cleramain la furmaziun da basa da sias studentas e da ses students ed a medem temp po ella realisar las furmaziuns supplementaras da las persunas d'instrucziun. L'edifizi annex ch'è previs correspunda als basegns actuals d'ina instrucziun ad ina scola auta e permetta a la scola da realisar en moda effizienta sia incarica legala da prestaziun. La regenza è persvadida che l'engrondiment da la SAPGR, ch'è la suletta instituziun trilingua sin il champ da furmaziun naziunal, rinforzia e creeschia la basa per ina instrucziun da scola primara en tuttas trais linguas chantunalas er en il futur.
L'edifizi d'engrondiment duai resguardar il standard da minergia. I vegn fatg quint cun custs totals da 5.8 milliuns francs. La primavaira 2009 èsi previs da cumenzar cun las lavurs da construcziun. Il temp da construcziun vegn a durar circa in onn e mez.

Gremi: regenza
Funtauna: rg chanzlia chantunala dal Grischun
Neuer Artikel