Cuntegn da la pagina

La ARGE ALP publitgescha in premi da musica

  • Erste Mitteilung
  • Neuen Beitrag einfügen
La cuminanza da lavur da las regiuns alpinas (ARGE ALP) fa ina concurrenza per chattar la meglra chanzun davart il tema "Alps". Musicistas giuvnas e musicists giuvens dals pajais commembers da la ARGE ALP pon inoltrar a partir d'immediat contribuziuns musicalas. Els pon gudagnar in premi da fin 15'000 euros.

Cun surdar in premi da musica vul la ARGE ALP, che vegn presidiada actualmain dal chantun Grischun, metter novs accents. Il premi 2009 da la ARGE ALP ha la finamira da promover musicistas giuvnas e musicists giuvens dal territori alpin e da dar ad ellas ed ad els la pussaivladad da cumprovar lur abilitads en ina concurrenza. La concurrenza da musica ARGE ALP Sound 2009 encurascha umans giuvens da sa fatschentar en moda creativa cun lur spazi da viver e cun il tema "Alps".

Il dretg da participaziun han solistas e solists e lur gruppas. Solistas e solists èn admess fin al 30avel onn da vegliadetgna cumplenì. Per las gruppas na dastga la vegliadetgna mesauna da tut las commembras e da tut ils commembers betg surpassar 30 onns. La premissa per la participaziun è il domicil fix en in dals suandants pajais commembers da la ARGE ALP: Baviera, Grischun, Salzburg, Son Gagl, Tirol dal sid, Tessin, Tirol, Trento, Vorarlberg. Il dumber da las commembras e dals commembers da las gruppas che han domicil en in dals pajais commembers da la ARGE ALP sto importar almain la mesadad. I vegn pretendì ch'ins cumponia, ch'ins scrivia il text e ch'ins registreschia sez ina chanzun davart il tema "Alps". Permess èn tut ils stils, dal rock fin a la musica classica.

Per lantschar il premi è vegnida endrizzada in'atgna pagina d'internet. Sut l'adressa d'internet www.argealpsound.org sa chattan tut las infurmaziuns impurtantas e las cundiziuns da participaziun detagliadas. Persunas interessadas pon chargiar lur contribuziuns musicalas a partir d'immediat directamain en furma electronica sin la pagina d'internet www.argealpsound.org e sa participar uschia a la concurrenza. Il termin d'annunzia dura fin il 1. da mars 2009.

Premi da fin 15'000 euros
Suenter la scadenza dal termin d'annunzia vegnan giurias regiunalas ad examinar las chanzuns inoltradas ed a tscherner fin tschintg contribuziuns per pajais commember. Ina giuria internaziunala vegn suenter a valitar questas chanzuns en la runda finala. La giuria che sa cumpona da spezialistas e da spezialists dals pajais commembers da la ARGE ALP vegn ad eleger ina fin trais victuras e victurs tranter las finalistas e finalists. Las victuras ed ils victurs survegnan in premi da fin 15'000 euros en furma d'in bon per equipament da musica u per ils custs da producziun d'in disc cumpact. La clav da repartiziun vegn fixada da la giuria. La surdada dal premi ha lieu il zercladur 2009 a Flem a chaschun da la conferenza da las scheffas e dals schefs da las regenzas. A las victuras ed als victurs vuless la ARGE ALP ultra da quai dar la pussaivladad da sa preschentar als festivals che han lieu en ses territori.

L'organisaziun per il premi da la ARGE ALP publitgescha adina puspè – per regla mintga dus onns – premis davart differents temas. L'ultima publicaziun d'in premi è stada l'onn 2007 sut il presidi dal Vorarlberg. Sut la devisa "giuven, cool ed engaschà" èn quella giada vegnids premiads projects che promovan l'engaschament voluntar da giuvenils.

Da la ARGE ALP, ch'è vegnida fundada l'onn 1972, fan part ils stadis federativs austriacs Tirol, Salzburg e Vorarlberg, las provinzas autonomas talianas Bulsaun-Tirol dal sid e Trento sco er la regiun taliana Lumbardia, il stadi liber tudestg da la Baviera ed ils chantuns svizzers Tessin, Son Gagl e Grischun. La finamira da la ARGE ALP è quella da tractar – en ina collavuraziun transcunfinala – problems cuminaivels e giavischs dals pajais commembers, d'approfundar la conscienza da la responsabladad communabla per il spazi da viver alpin, da promover ils contacts tranter la populaziun e da rinforzar la posiziun dals pajais, da las regiuns, da las provinzas e dals chantuns.

Gremi: chanzlia chantunala dal Grischun
Funtauna: rg chanzlia chantunala dal Grischun
Neuer Artikel