Navigation

Inhaltsbereich

  • Erste Mitteilung
  • Neuen Beitrag einfügen
Perquai che l'affluenza da requirentas e da requirents d'asil è anc adina gronda, è il chantun Grischun sfurzà d'augmentar las capacitads da collocaziun en il sectur d'asil. Sin mez december 2008 vegn il center per l'emprima registraziun Foral a la Schönbühlstrasse a Cuira engrondì per 80 plazzas cun prender en locaziun ina immobiglia. Plinavant tschertga l'uffizi da fatgs da polizia e da dretg civil in'ulteriura immobiglia che duai vegnir averta en il decurs da l'enviern.

Il dumber da requirentas e da requirents d'asil crescha dapi l'avrigl 2008, ed ad interim èsi pauc probabel che questa tendenza sa midia. Fin la fin d'october 2008 è il dumber da dumondas d'asil novas gia s'augmentà per 70 pertschient en cumparegliaziun cun l'onn precedent. Il chantun Grischun sto surpigliar e collocar 2,7 pertschient da las requirentas e dals requirents d'asil. Per dar dumogn a questa ferma affluenza ha il chantun Grischun gia transfurmà il center d'expulsiun Flüeli a Valzeina en in center transitoric, uschia ch'i po vegnir dà dimora là a las requirentas ed als requirents d'asil durant lur procedura d'asil.

Plinavant vegn ussa augmentada per 80 plazzas la capacitad d'accoglientscha dal center per l'emprima registraziun Foral a Cuira. Per quest intent vegn prendida en locaziun ina immobiglia en la proxima vischinanza. Quest object è vegnì duvrà gia pli baud sco alloschi collectiv ed era adattà fitg bain per collocar requirentas e requirents d'asil. Sin il cumenzament da la locaziun na ston pia vegnir fatgas naginas adattaziuns architectonicas. Cun questa immobiglia duai a medem temp vegnir ademplida l'obligaziun che la confederaziun ha puspè surdà pir dacurt als chantuns, numnadamain da procurar per il potenzial strategic da surpigliar requirentas e requirents d'asil.

Cunquai ch'ina reducziun da las dumondas d'asil n'è ad interim betg en vista, è il chantun Grischun sfurzà d'avrir – en il decurs da l'enviern – in ulteriur center transitoric cun 60 fin 80 plazzas. Actualmain vegnan tschertgads alloschis adattads.

Gremi: departament da giustia, segirezza e sanadad
Funtauna: rg departament da giustia, segirezza e sanadad
Neuer Artikel