Cuntegn da la pagina

La regenza beneventa il plan da la confederaziun da metter a disposiziun las reservas per procurar lavur ch'èn favurisadas areguard la taglia

  • Erste Mitteilung
  • Neuen Beitrag einfügen
La regenza grischuna sustegna il plan da la confederaziun da metter a disposiziun las reservas per procurar lavur ch'èn favurisadas areguard la taglia. Previs èsi ch'il departament federal d'economia inizieschia en tut la Svizra ina deliberaziun da las reservas per procurar lavur ch'èn favurisadas areguard la taglia per il 1. da schaner 2009. Circa 650 interpresas pudessan profitar da reservas da circa 550 milliuns francs.
Er sche la sfradentada economica n'è actualmain anc betg percurschibla sin il martgà da lavur, va la regenza d'accord cun la valitaziun concernent la sfradentada conjuncturala, cun la quala sto vegnir fatg quint. Sco che la regenza scriva en il rom da l'audiziun tras il departament federal d'economia, èn - en vista a questas prognosas - las premissas senza dubi ademplidas per metter a disposiziun generalmain las reservas per procurar lavur.

Mussavia per implants d'energia dal vent
En il Grischun è vegnida stgaffida la basa per giuditgar unitarmain implants d'energia dal vent. La regenza grischuna ha prendì enconuschientscha dal nov mussavia correspundent davart implants d'energia dal vent. Quel serva a las autoritads ed a las projectantas ed als projectants sco basa per giuditgar unitarmain implants d'energia dal vent. Tenor il mussavia duain en in emprim pass vegnir definids ils territoris, nua che implants d'energia dal vent èn exclus. Sco segund pass suondan las pretensiuns generalas ad in project che valan per ils ulteriurs territoris. Uschenavant ch'i dat conflicts concernent la cumpatibilitad cun il territori sto vegnir fatga ina consideraziun dals interess. Sco terz pass ston la finala vegnir ademplids tscherts criteris da qualificaziun.
Il rapport cun il titel "Implants d'energia dal vent (IEV), mussavia sco basa da giudicament per las autoritads sco er per las projectantas e per ils projectants" è vegnì elavurà d'ina gruppa da lavur da represchentantas e da represchentants da l'uffizi d'energia e da traffic, da l'uffizi per il svilup dal territori sco er da l'uffizi per la natira e l'ambient. El vegn publitgà sin las paginas d'internet dals uffizis involvids e fatg uschia accessibel a la publicitad.

Nagins projects chantunals da votaziun ils 8 da favrer 2009
La regenza ha prendì enconuschientscha dal fatg ch'il conclus federal dals 13 da zercladur 2008 pertutgant l'approvaziun da la cuntinuaziun da la cunvegna tranter la Svizra e la communitad europeica e ses stadis commembers davart la libra circulaziun da persunas sco er pertutgant l'approvaziun e la realisaziun dal protocol concernent l'extensiun da la cunvegna davart la libra circulaziun da persunas sin la Bulgaria e sin la Rumenia vegn suttamess sco project federal a la votaziun dal pievel da dumengia, ils 8 da favrer 2009. A questa votaziun na vegnan suttamess nagins projects chantunals.
Approvà l'adattaziun da las disposiziuns executivas tar la lescha davart il sport da muntogna e da naiv
La regenza grischuna ha approvà ina revisiun parziala da las disposiziuns executivas tar la lescha davart il sport da muntogna e da naiv. La revisiun parziala regla - sut tschertas circumstanzas - da nov er l'exercizi d'activitads en la vischinanza da pistas e da loipas. Las disposiziuns executivas entran en vigur ils 5 da december 2008.

Da vischnancas e da regiuns
Schiers: Il project d'ina "dustanza Äulitobel" da la vischnanca da Schiers vegn approvà e sustegnì cun ina contribuziun da maximalmain 249'600 francs.
Sursaissa: La revisiun parziala da la planisaziun locala da la vischnanca da Sursaissa dals 29 d'avust 2008 vegn approvada.
Grischun central: La regenza ha approvà la lescha davart il svilup dal territori e davart il plan directiv che la radunanza da la corporaziun regiunala "Regiun Grischun central" ha concludì ils 20 da november 2007. Per realisar il program da plirs onns concernent il svilup regiunal e territorial dal Grischun central per la perioda 2007 - 2010 vegn concedì in credit da 130'000 francs.
Calanca: La lescha davart il svilup dal territori e davart il plan directiv che la radunanza da la corporaziun regiunala "Organisaziun regiunala da la Calanca ORC" ha concludì ils 4 da december 2007 vegn approvada. Per realisar il program da plirs onns concernent il svilup regiunal dal territori da la Calanca per la perioda 2007 - 2010 vegn concedì in credit dad 80'000 francs.
Partenz: La regenza ha approvà l'ordinaziun davart il svilup dal territori e davart il plan directiv che la radunanza da delegadas e da delegads da la corporaziun regiunala "Pro Partenz" ha concludì ils 22 da matg 2008. Per realisar il program da plirs onns concernent il svilup regiunal e territorial dal Partenz per la perioda 2007 - 2011 vegn concedì in credit da 125'000 francs.

Contribuziuns chantunalas a differentas instituziuns
Binari da colliaziun da la Holcim SA: Per renovar respectivamain per engrondir ils binaris da colliaziun da la firma Holcim SA a Vaz sut vegn garantida ina contribuziun chantunala da maximalmain 357'935 francs.
Abitadi per persunas attempadas Bodmer a Cuira: Il project preliminar per substituir l'edifizi da la chasa da persunas attempadas e da tgira Bodmer a Cuira vegn approvà. Cun resalva da l'approvaziun definitiva dal project vegn garantida a l'instituziun responsabla ina contribuziun chantunala da maximalmain 14'000'000 francs.
Teater da Cuira: Per l'emprima part da la stagiun 2008/2009 (atun/enviern 2008) survegn il teater da Cuira ina contribuziun chantunala da 100'000 francs.

Projects da vias
La regenza ha approvà totalmain 520'000 francs per construir e per sanar il suandant traject da via:
- via naziunala A28: installaziuns electricas da current ferm, sviament Saas

Chanzlia chantunala dal Grischun

Gremi: regenza
Funtauna: rg chanzlia chantunala dal Grischun
Neuer Artikel